Mbështeti sulmin e Putinit në Ukrainë, pushohet nga puna shefi i filharmonisë së Münchenit
Kryetari i Bashkisë München, Dieter Reiter, ka pushuar nga puna Drejtorin e filharmonisë së Münchenit, Valeri Gergiev pasi refuzoi të distancohet nga sulmi rus në Ukrainë.
“Gergiev, përkundër faktit se iu kërkua, nuk u distancua nga agresioni brutal i Putinit kundër Ukrainës dhe në veçanti qytetit-partner Kievit,” tha Kryetari i Bashkisë München, Dieter Reiter, për dirigjentin e njohur rus i cili njihet dhe si mik i ngusht i Vladimir Putinit.
Reiter i kishte dhënë një ultimatum të premten dirigjentit të njohur, i cili në krye të filharmonisë së Münchenit është nga viti 2015, që të distancohet nga sulmi i Rusisë mbi Ukrainë, gjë të cilën Georgiev nuk e bëri.
“Kam pritur që Gergiev ta ndryshoj vlerësimin e tij shumë pozitiv ndaj presidentit Putin. Por ai nuk e bëri këtë gjë,” tha Dieter Reiter, kryetari i bashkisë së tretë më të madhe në Gjermani duke sqaruar se sinjali i qartë për Gergievin ishte i domosdoshëm për orkestrin, publikun, opinionin dhe politikën e qytetit që të mundësohet vijimësia e bashkëpunimit.
Zyra e Kryetarit të Bashkisë München ka sqaruar se vendimi për largimin e Gergievit hynë në fuqi menjëherë dhe se nuk do të ketë më koncerte që do të drejtohen nga ai. Edhe Agjencia e Gergievit nga Müncheni e ka ndërprerë kontratën me dirigjentin rus.
Mbështeti aneksimin e Krimesë
Gergiev ka kohë që është në shënjestër të kritikave për shkak të mbështetjes së hapur që i ka dhënë politikës së Vladimir Putinit. Në vitin 2014 firmosi dhe peticionin me të cilin mbështeste aneksimin e Krimesë.
Fundjavën e kaluar, dirigjenti i njohur rus nuk ka drejtuar as filharmoninë e Vjenës në koncertin në Carnegie Hall në New York, pas vendimit të këtyre dy institucioneve me fillimin e pushtimit rus të Ukrainës.
Dje, edhe filhharmonia e Parisit bëri të ditur se ka anuluar koncertet e Valeri Gergiev “duke u solidarizuar me popullin ukrainas”.
La Scala milaneze i ka bërë thirrje javën e kaluar maestro Gergievit që publikisht të angazhohet për “zgjidhje paqësore” të konfliktit, duke e kërcënuar me ndërprerjen e bashkëpunimit në dy projektet e ardhshme gjatë muajit mars.
Ndryshe, Valeri Gergiev, 68 vjeç, është drejtuesi kryesor i teatrit Mariinsky në Saint Petersburg dhe njëri prej dirigjentëve më të kërkuar në botë.
Për shkak të miqësisë me Putinin, me të cilin njihet nga viti 1992, mbështetjes që i ka dhënë për aneksimin e Krimesë dhe pjesëmarrjes në koncerte në Osetinë e Jugut dhe Palmirin e bombarduar, ku mbështeti ushtrinë siriane, ishte në qendër të shumë polemikave në 10 vitet e fundit.
