Mbështetje pa kushte VMRO-DPMNE-së, E Majta: Vetëm mos kosovarizo Parlamentin e Maqedonisë

E Majta nuk do ta mbështes kandidatin shqiptar për Kryetar të Parlamentit të Maqedonisë Veriore, tha sot kryetari i kësaj partie, Dimitar Apasiev madje ai shkoi edhe një hap tutje në specifikimin e urrejtjes së tij antishqiptare.

Dimitar Apasiev i ofroi mbështetje pa kushte kreut të VMRO-DPMNE-së vetëm e vetëm të mos kosovarizoj sërish Parlamentin e Maqedonisë.

“Ne do të japim mbështetje që të mos jetë shqiptar kryetari i ardhshëm i Parlamentit, ja hapur i bëjmë thirrje Mickoskit që do ta mbështesim pa kushte, vetëm e vetëm që të mos kosovarizohet sërish Parlamenti i Maqedonisë,” tha Dimitar Apasiev. 

Ndërkohë që filloi verifikimi i mandateve të deputetëve dhe përkundër dëshirës së zjarrtë të Apasievit, VLEN ka bërë të ditur se Afrim Gashi, Kryetar i ri i Parlamentit tashmë është punë e kryer me marrëveshjen me VMRO-DPMNE-në.

“Grupet e punës të VLEN-it, si përfaqësues legjitim i shqiptarëve, dhe VMRO DPMNE-së si fituese e zgjedhjeve, në kuadër të bisedimeve për formimin e qeverisë me sukses e kanë përmbyllur harmonizimin e programeve zgjedhore dhe kanë arritur marrëveshje që për kryetar të Parlamentit të propozohet Afrim Gashi,” thekson VLEN duke shtuar:

“Grupet e punës intensivisht vazhdojnë negociatat për eshalonin e dytë dhe të tretë. Shumë shpejt si shtet do të kemi një qeveri evropiane, e përkushtuar për rritje ekonomike, investime dhe përmirësim të standardit jetësor të qytetarëve.”