Mbështetje të pakufizuar me likuiditet, Banka e Shqipërisë: Deri në fund të marsit 2021!
Banka e Shqipërisë do të vijojë me injektimin e pakufizuar të likuiditetit në sistemin bankar të paktën deri në fund të marsit 2021.
Guvernatori i Bankës së Shqipërisë, Gent Sejko, tha pas mbledhjes së Këshillit Mbikëqyrës se politika monetare do të vijojë të mbetet lehtësuese gjatë gjithë horizontit të parashikimit.
Banka qendrore do të vijojë të ruajë formën aktuale të operacioneve të injektimit të likuiditetit, formë e cila garanton injektimin e pakufizuar në sasi të tij, deri në fund të tremujorit të parë të vitit të ardhshëm.
Pas shpërthimit të krizës së lidhur me pandeminë e Covid-19, në muajin mars, Banka e Shqipërisë ndryshoi formën e ankandeve të marrëveshjeve të riblerjes, nga ankand me shumë të fiksuar në ankand me çmim uniform. Ky ndryshim u bë pikërisht për të garantuar furnizim të pakufizuar me likuiditet për bankat tregtare.
Shifrat e publikuara në fillim të muajit tetor treguan rritje të ndjeshme të injektimit të likuiditetit në tremujorin e dytë të vitit. Injektimi mesatar ditor ishte 33.6 miliardë lekë, nga 26.9 miliardë lekë që kishte qenë në tremujorin e dytë të vitit 2019.
Sipas Bankës së Shqipërisë, pjesëmarrja e bankave në ankande ka qenë në nivele rekord deri në mesin e muajit maj, ndërsa më pas interesi ka rënë gradualisht. Kjo tregon se presioni i krizës mbi likuiditetin e bankave është zbutur ndjeshëm.
Pas përfundimit të moratoriumit të parë tremujor, një pjesë e mirë e klientëve rifilluan pagesat e kësteve të kredive, duke kthyer flukset hryëse të likuiditetit në sistemin bankar.
Paralelisht, edhe kërkesa e qeverisë për borxh të ri u reduktua ndjeshëm, pas huamarrjes intensive në tremujorin e dytë.
Këta faktorë, së bashku me rritjen e qëndrueshme të depozitave, sollën një përmirësim të gjendjes së likuiditetit dhe një kërkesë më të ulët për mbështetje në instrumentet afatshkurtra të ofruara nga Banka e Shqipërisë.
Megjithatë, banka qendrore ka siguruar sistemin se kjo formë mbështetje do të vazhdojë edhe për të paktën gjashtë muaj të tjerë./Monitor/
