Mbetet pezull lista e projekteve prioritare të investimeve, shkak dhënia e PPP-ve

Me një kredi të posaçme të dhënë nga donatorët në vitin 2014 prej rreth 100 milionë eurosh ndër të tjera synonte të përmirësonte eficencën e investimeve publike. Angazhimet në këtë drejtim synonin krijimin e një e një Listë të Unifikuar të Projekteve kombëtare, në të cilat do të fokusoheshin fondet publike. Lista do të ndihmonte kontrollin më të mirë mbi fondet e investimeve dhe ti fokusonte ato në projekte me fisibilitet të lartë.

Mirëpo nisma e qeverise për të transferuar një pjesë të fondeve buxhetore në financimin e kontratave koncesionare me PPP ka penguar miratimin final te  listës së projekteve të unifikuara.

Një raport monitorimi për zbatimin e Strategjisë për Menaxhimin e Financave Publike që u publikua këto ditë nga Ministria e Financave vuri në dukje se, projekt-lista e Projekteve Kombëtare të Aprovuara është hartuar pavarësisht nga burimi i financimit, por nuk u aprovua brenda vitit 2019 nga Komiteti i Planifikimit Strategjik (KPS).

KPS që ka në përbërjen e tij përfaqësues nga Kryeministra, Ministria e Financave, etj nuk i miratoi projektet prioritare kombëtare të investimeve për shkak të angazhimeve që qeveria ka marrë për të investuar fondet publike në kontrata të Partneritetit Publik- Privat. Siç sqarohet në analizën e Ministrisë së financave lista e PPP me fonde buxhetore kërkonte një kuadër rregullator më të fortë monitorimi  dhe mbikëqyrës dhe duket se ka ngjallur debat në qarqet e ekspertëve nëse duhet të përfshiheshin në listën e projekteve prioritare.

Ministria e Financave aktualisht ka publikuar një listë të projekteve që financohen nga investimet publike. Sipas të dhënave të 6 mujorit të parë 2020 janë rreth 2000 projekte investimesh në të gjithë vendin duke përfshirë pushtetin qendror dhe lokal, të cilat janë financuar për periudhën me rreth 25 miliardë lekë. Financimi mesatar për projekt është 43 milionë lekë.

nga lista e investimeve ka një copëzim të lartë të projekteve. Për shkak të kësaj situate qeveria nuk arrin të prodhojë një produkt të dukshëm. Përvoja ka treguar se copëzimi i lartë në shumë projekte i fondit të investimeve rrit gjasat për korrupsion.

Për këtë arsye, qeveria në vitin 2014 në strategjinë e Menaxhimit të Financave publike mori angazhimin e krijimit të listës së projekteve kombëtare me qëllim krijimin e një fokusi më të qartë të investimeve, por ky detyrim nuk është përmbushur gati 6 vite pas./Monitor/