Mbi 100 mijë viktima nga COVID-19 në Gjermani

Gjermania është bërë shteti i fundit që ka regjistruar mbi 100.000 viktima nga koronavirus, prej shpërthimit të pandemisë.

Sipas të dhënave të publikuara sot nga autoritetet gjermane, gjatë 24-orëve janë regjistruar 351 vdekje shtesë, duke e çuar totalin në 100.119.

Në Evropë, Gjermania është shteti i pestë që ka kaluar këtë shifër pas Rusisë, Mbretërisë së Bashkuar, Italisë dhe Francës.

Instituti Robert Koch, tha se Gjermania ka regjistruar shifër rekorde të infektimit brenda një dite, përkatësisht 75.961.

Prej fillimit të pandemisë, Gjermania ka regjistruar më shumë se 5.57 milionë raste, raporton RFE. Spitalet kanë paralajmëruar se është duke u zvogëluar numri i shtretërve në dhomat për kujdes intensiv dhe në disa lande, autoritetet kanë nisur të transferojnë pacientët nëpër rajone tjera.