Mbi 13 mijë qytetarët të Kosovës kanë hyrë në Shqipëri, edhe sot kolona të gjata

Vendosja e masave të reja kundër COVID-19 ku përfshihet edhe mbyllja e gastronomisë dhe qendrave tregtare, ka bërë që shumë qytetarë të Kosovës të dynden në Shqipërisë për të kaluar këtë fundjavë. Radhë të gjata të veturave janë parë gjatë ditës së premte në kufi, situatë e tillë është edhe sot.

Mbi 13 mijë qytetarë të Kosovës e kanë kaluar kufirin me Shqipërinë vetëm gjatë ditës së djeshme për të kaluar fundjavën. Arsyeja më e madhe e dyndjes drejt Shqipërisë ishin masat kufizuese që janë vendosur në Kosovë.

Edhe sot fluksi i makinave për të dalë nga Kosova në Shqipëri është i madh.

Qendra Kombëtare e Menaxhimit Kufitar ka njoftuar se pritja në kufi është duke zgjatur deri në mbi 30 minuta. Kurse kolonat e makinave janë nga 300 deri në 400 metra.

Qytetarët deklaruan se ata janë duke shkuar në shtetin fqinj pasi munden të frekuentojnë kafenetë dhe restorante, pasi në Kosovë janë të mbyllura.

Policia e Kosovës ka treguar se deri në orën 17:30 sipas statistikave zyrtare kufirin e kanë kaluar 11 mijë e 570 qytetarë.

“Këto janë statistikat në dalje nga Kosova për në Shqipëri për datën 09.04.2021 duke filluar nga ora 00:00 deri në ora 17:30. 2 mijë e 788 vetura, 29 autobusë, 322 kamionë me gjithsej 11 mijë e 570 pasagjerë”.

Për ata që duan të kalojnë kufirin me Shqipërinë ose anasjelltas, aktualisht nuk ka ndonjë masë ndaluese apo kërkesë për tu pajisur me test negativ PCR.

“Si në drejtim të Kosovës, ashtu edhe në drejtim të Shqipërisë për shtetasit Kosovës nuk do të ketë nevojë për teste apo PCR”, u shpreh ambasadori i Shqipërisë në Kosovë, Qemal Minxhozi.

Minxhozi foli edhe për marrëveshjet mes qeverisë së Shqipërisë edhe asaj të Kosovës, për të cilat tha se kanë qenë një shtysë e madhe për ekonominë.

“Marrëveshjet nga viti 2014 deri më sot me te gjitha mangësitë që kanë pasur, kanë një qenë një shtysë e madhe sidomos në fushën e ekonomisë”.

Qeveria e Kosovës nga 7 prilli ka filluar zbatimin e masave të reja për mbrojtjen ndaj COVID-19. Këto masa janë marrë pas rasteve të shumta pozitive dhe rasteve të vdekjes si pasojë e infektimit me koronavirus.

Disa nga masat kryesore janë ora policore prej orës 22:00 deri në orën 05:00 dhe mbyllja e gastronomisë për 11 ditë, pra për periudhën 7-18 prill lejohen vetëm shërbimet take-away.

Përveç gastronomisë, janë mbyllur edhe qendrat tregtare dhe fitneset.

Gjithashtu institucionet publike dhe private parauniversitare do të kalojë online nga 12 deri më 18 prill, ndërsa ato universitare nga 7 deri më 18 prill.

Shqipëria javëve të fundit ka shënuar rënie të vdekjeve dhe rasteve të reja si pasojë e COVID-19 derisa në Kosovë ato janë rritur dukshëm./Monitor/