Mbi 43 mijë të vdekur nga tërmetet në Turqi, ITU: Toka u zhvendos 4.7 metra! 

Numri i personave që kanë humbur jetën nga tërmetet e 6 shkurtit në Turqi është rritur në 43.556, njoftoi ministri i Punëve të Brendshme i Turqisë, Süleyman Soylu.

Soylu, raporton Agjencia e lajmeve Anadolu, i bëri komentet gjatë një transmetimi të drejtpërdrejtë me TRT Haber në Hatay, një nga 11 provincat që u goditën nga tërmetet.

“Ky është një nga tërmetet më të mëdha në botë”, tha ai.

Ndërkohë shkencëtarët nga Universiteti Teknik i Stambollit, ITU kanë publikuar një raport hetimor paraprak mbi tërmetet e 6 shkurtit, duke thënë se në një zonë pranë epiqendrës së tërmetit, toka u zhvendos deri në 4,7 metra.

Shkencëtarët e ITU paralajmëruan, raporton TRT, se do të publikojnë një Raport tjetër të katastrofës pasi të bëhet një analizë e plotë.

Tërmetet me magnitudë 7.7 dhe 7.6 goditën, me epiqendër në Kahramanmaraş, goditën 11 provinca, duke përfshirë provincat Adana, Adiyaman, Diyarbakır, Hatay, Gaziantep, Malatya, Kilis, Osmaniye, Elazığ dhe Şanlıurfa, raporton Agjenca e lajmeve Anadolu.

Më shumë se 13 milionë njerëz janë prekur nga tërmetet shkatërruese.

Disa vende në rajon, duke përfshirë Sirinë dhe Libanin, gjithashtu ndien lëkundjet e forta.