Mbi 50.000 viktima nga koronavirusi në Gjermani

Mbi 50.000 njerëz kanë vdekur pas infektimit me koronavirus në Gjermani, shifër kjo që është rritur me shpejtësi gjatë javëve të fundit.

Instituti Robert Koch tha sot se 859 viktima janë regjistruar në 24 orët e fundit, të cilat e çojnë në 50.642 numrin e të vdekurve që nga fillimi i pandemisë, në mars të vitit të kaluar.

Gjermania ka pasur një numër relativisht të vogël të viktimave në fazën e parë të pandemisë, por kjo ka ndryshuar këtë dimër.

Qindra vdekje, nganjëherë edhe mbi 1.000 janë raportuar në ditë, në vendin me 83 milionë banorë.

Në mesin e vendeve të tjera evropiane, Britania e Madhe, Italia, Franca dhe Spanja, që të gjitha kanë popullsi më të vogël se Gjermania – kanë shifra më të larta të viktimave.

Gjermania, raporton RFE, e cila ndodhet nën masa të rrepta izolimi, ka tani rënie të numrit të të infektuarve, pas kulmit që ka arritur në dhjetor. Instituti Robert Koch raportoi sot për 17.862 raste të reja, krahasuar me 22.368 një javë më parë.

Ndryshe, deri më sot Gjermania ka konfirmuar mbi 2.1 milionë raste me koronavirus.