Mbi 60 të vrarë nga sulmi në një dasmë në Kabul

Një bombë ka shpërthyer në një sallë dasmash në kryeqytetin e Afganistanit, Kabul, duke lënë të vdekur 63 persona dhe duke plagosur më shumë se 180 të tjerë.

Dëshmitarët kanë thënë për BBC-së, se sulmuesi vetëvrasës ka kryer sulmin gjatë një ceremonie të dasmës.

Shpërthimi ka ndodhur në perëndim të kryeqytetit, kryesisht të populluar me myslimanë shiitë. Ende nuk dihet se kush ka kryer këtë sulm.

Militantët myslimanë sunitë, duke përfshirë, talibanët dhe grupin militant, Shteti Islamik kanë kryer sulme në zonat e banuara me myslimanë shiitë në Afganistan dhe Pakistan.

Ministria e Brendshme afgane ka konfirmuar se ka dhjetëra të vdekur si pasojë e sulmit.

Në dasmat afgane zakonisht janë të ftuar qindra persona, dhe zakonisht burrat janë të ndarë nga gratë dhe fëmijët. Mysafiri, Mohammad Farhag, tha se ka qenë në zonën e grave kur ka dëgjuar një shpërthim masiv në anën e burrave.

“Të gjithë kanë dalë jashtë duke bërtitur dhe duke qarë,” tha ai për agjencinë e lajmeve AFP.

“Për gati 20 minuta salla ka qenë e mbushur me tym. Pothuajse të gjithë burrat që kanë qenë aty janë të vrarë apo të plagosur.

Dhëndri i dasmës, Mirwais tha për një televizion lokal:

“Familja ime, nusja ime janë të shokuar, nuk mund të flasin. Kam humbur vëllanë, shokët, familjarët. Nuk do të jem i lumtur kurrë më.”

Presidenti afgan, Ashraf Ghani, përmes një postim në rrjetin social, Twitter, e ka përshkruar sulmin si barbar, ndërsa Zëdhënësi i talibanëve, Zabiullah Mujaheed, e ka dënuar ashpër sulmin:

“Nuk ka arsyetim për vrasje të tilla dhe shënjestrim të grave dhe fëmijëve,” tha Mujaheed, raporton RFE.

Ndryshe, ky sulm ka ndodhur 10 ditë pasi një sulm me bombë pranë komisaratit të policisë në Kabul duke lënë të vdekur 14 persona dhe 150 të plagosur. Përgjegjësinë për këtë sulm e morën talibanët.

Tensionet në këtë shtet kanë qenë të larta, pavarësisht që SHBA dhe talibanët janë deklaruar se janë afër arritjes së një marrëveshjeje për paqe.