Mbi tre orë në SPAK, Ish-Këshilltari i Ilir Metës tregon arsyen pse u thirr

Ish-Këshilltari i Ilir Metës dhe ish-deputeti i Lëvizjes Socialiste për Integrim, Ralf Gjoni, dha shpjegime për 4 orë në SPAK, në kuadër të hetimeve që po kryen ndaj Ish-Presidentit Ilir Meta dhe bashkëshortes së tij, deputetes së Partisë së Lirisë, Monika Kryemadhi.

Ralf Gjoni nuk bëri asnjë koment në lidhje me sa dëshmoi në prokurori vetëm se tha se nuk ishte si person në hetim

“Jam pyetur si shtetas në cilësinë e të angazhuarit në angazhime dhe pozicione shtetërore. Nuk u pyeta si person në hetim. Nuk ka arsye për të më hetuar mua. Nuk kam qenë pjesë e dosjes së ish presidentit Meta, se s’kam qenë në kontakt me të kur ka qenë kryetar shteti. Nuk ka asnjë arsye për të më hetuar mua. Nuk mund të them më shumë, mund të pyesni prokurorët. Dua të respektohem dhe dua të tregohem profesional, kaq kisha për të thënë,” tha Ish-Këshilltari i Kryetarit të Parlamentit, Ilir Meta dhe ish-deputeti i LSI.

SPAK mësohet ta ketë pyetur për marrëdhëniet që ka patur me Ilir Metën e Monika Kryemadhin.

Ndryshe, SPAK po heton çiftin Meta-Kryemadhi për çështjen CEZ-DIA, kontratat e lobimit me SHBA dhe pasurinë e tyre.

Dihet që deputeti Ralf Gjoni u nda nga çifti Meta-Kryemadhi në vitin 2019, pasi refuzoi të dorëzonte mandatin e deputetit.