Mbledhja e përbashkët e organeve të drejtësisë, Llagami: Sistemi do ja dalë! Ibrahimi: Të zbusim pasojat e Vettingut! Çela: Me KLP…

Në mbledhjen e parë të përbashkët të organeve të reja të drejtësisë, Kryetarja e Këshillit të Lartë Gjyqësor, KLGJ, Naureda Llagami, tha se sistemi do ja dalë siç duhet, nëse të gjithë përfaqësuesit e organeve të drejtësisë kuptojnë nevojat dhe mundohen t’i adresojnë, duke u mbështetur te njëri-tjetri.

“Misioni vazhdon, qëndresa po. Mesazhi im është që gjithçka duket e pamundur, derisa të arrihet. Jam besimplotë që nëse të gjithë këtu kuptojmë nevojat që kemi dhe mundohemi t’i adresojmë, duke u mbështetur te njëri-tjetri, padiskutim që sistemi do ja dalë ashtu siç duhet,” tha Llagami ndërsa Kryetari i Këshillit të Lartë të Prokurorisë, KLP, Gent Ibrahimi, foli për mungesat e mëdha në sistem, që ka shkaktuar procesi i Vettingut, duke shtuar se duhen përdorur të gjitha mjetet e metodat për të zbutur këtë problematikë.

“Shqetësimet tona jam i bindur që përkojnë plotësisht me ato të shoqërisë. Vettingu është një politikë publike, që gëzon një legjitimitet të plotë, por pasojat e tij janë ato që janë. Sot po bëhet gjithnjë e më e vështirë për të marrë drejtësisë në dyert e institucioneve të drejtësisë. Detyra jonë është të gjejmë mjetet dhe mënyrat për të adresuar këtë problem, për të zbutur pasojat e Vettingut. KLGJ filloi të diskutonte njërën nga këto instrumente dje me hartën e re gjyqësore, ne kemi më shumë se kaq si instrumente në dorë, ndaj jemi mbledhur sot. Çështja e parë që do diskutojmë është pikërisht problematikat e shkaktuara në sistemin e drejtësisë si rezultat i zbatimit të Vettngut. Sfidat janë evidente,” tha kreu i KLP duke përfunduar:

“Ajo çka ne do të diskutojmë me përparësi sot janë mjetet, metodat, që kanë në dispozicion dy këshillat për ta zbutur këtë problematikë.”

Ndërkohë Prokurori i Përgjithshëm, Olsian Çela, tha që sistemi të funksionojë duhet të ketë më shumë bashkëpunim mes strukturave.

“Nëse sot e vlerësojmë situatën në pikëpamje numerike, harrojmë një fakt të rëndësishme që perceptimi i punës nga opinion publik apo kërkesat që duhet tu përgjigjemi edhe në nivel ndërkombëtar, nuk i marrin në konsideratë, problemet tona të brendshme apo nevojat tona të brendshme.

Nga ne kërkohet të performojmë dhe çdo vendim që merret në karrierën e magjistratëve ndikon tek performanca. Ndaj mendoj që Këshilli i Lartë i Prokurorisë të qëndrojnë më afër në rregullimin e këtyre problemeve. Në disa raste Këshilli i Lartë i Prokurorisë dhe Prokuroria e Përgjithshme do të duhet të kishte një qasje më bashkëpunuese. Vlerësoj se ka një keqkuptim të madh mes këtij raporti. Është thelbësore që ne të jemi afër dhe këto takime janë të rëndësishme për të diskutuar. Prokuroria e Përgjithshme ka bërë të pamundur për t’ju përgjigjur boshllëqeve që ka sistemi sa i përket vakancave,” tha Kryeprokurori Çela i bindur:

“Nëse duam që ky sistem të funksionojë, nuk kemi zgjidhje tjetër veçse të bashkëpunojmë!”