Mbledhja e Qeverisë, Rama: 20 mln lekë në dorë kush e bënë vetë shtëpinë në fshat. Ja ku do të ndërtohen lagjet e reja…
Në Mbledhjen e jashtëzakonshme të Qeverisë që edhe sot filloi në orën 07:00 në ERTV, Kryeministri Edi Rama dha detaje rreth planit të rindërtimit duke saktësuar se pas procesit të pastrimit do të nisë ndërtimi i lagjeve të reja për banorët e prekur nga tërmeti. Për ata banorë në fshat që duan të bëjnë vetë banesat e tyre, Kryeministri tha se do të ketë para në dorë
“Të bëjmë gati planin për shtëpitë individuale, për pallatet 100 % është barra e qeverisë dhe kompanitë të mëdha, për ato individuale duhet bërë harta e veprimit që të ndajmë me organizatat solidare, që tu japim hartën zonën, numrin që procesi të nisë. Familjet në fshat që duan të rindërtojnë vetë shtëpitë tu japim financim, faktikisht me një financim në 20 mln lekë të vjetra mesatarisht ata janë gati që ta bëjnë vetë, se fitojnë kohë dhe nuk presin që të vijë dikush, por kuptohet me supervizionim që të garantojë gjithë parametrat,” tha Edi Rama ndërsa garantoi se janë marrë të gjitha provat për të gjitha ndërtesat dhe ato që janë në rrezik.
“S’ka asnjë provë që fshihet. Të gjitha ato hot-spotet për të mbyllur ngjarjet, dhe aty ku fillon pastrimi janë mbyllur nga pikëpamja e hetimit. Leja, fotografimi i situatës, ndaj s’ka asgjë të kësaj natyre. Duhet bërë dhe lista e firmave të ndërtimit, bazuar në këtë test, që do të jenë short-testimin për të marrë pjesë në programin e ndërtimit.”
Me këtë rast Edi Rama vuri në dukje një problem me të cilën do të përballet ky rindërtim e që ka të bëjë me mungesën e fuqisë punëtore, dhe që kërkon ndërhyrje me një ligj në mënyrë që të mundësohet marrja e fuqisë punëtore edhe nga jashtë.
“Procesi i ndërtimit kërkon fuqi të madhe punëtore. Nga eksperienca dhe çfarë kam parë nga kompanitë, kemi probleme në fuqitë punëtore në ndërtim. Duhet përfituar që të kërkojmë fuqi punëtore të huaj, në rast se del nevoja për fuqi punëtore. Duhen mijëra njerëz që do të përfshihen në punë. Në datën 19 duhet të kalojë paketa për aksesin në fuqi punëtore, që kompanitë të marrin nga jashtë,” tha Kryeministri duke dhënë dhe detaje konkrete për nisjen e punimeve.
“Do nisim punën në Laç për t’i hapur rrugën këtij procesi. Ia kemi kërkuar që të nisë puna kompanisë turke ku presidenti turk ka dhënë pëlqimin për të ndërtuar 500 apartamente. Do vijojmë ndërhyrjen dhe në Durrës, në vijën bregdetare. Tirana në zonën e “5 Majit” duhet rishikuar në funksion të situatës një plan i kahershëm që kemi pasur. Pallatet e vjetra në Kombinat duhet të hidhen në tokë, dhe ato pallatet sovjetike. Aty kemi një pol të ri për të ndërtuar, tek ‘5 Maji’, apo dhe te Ish-Uzina e Autotraktorëve. 4.949 banesa janë dëmtuar në Durrës në total. 6.121 në Tiranë. 1.171 në Durrës të pabanuara dhe 660 në Tiranë, këtu kemi mbyllur pjesën e bonusit. Në Durrës duhet të mendojmë mirë pasi nuk ka apartamente, janë të shitura. Duhet të mendojmë që t’i spostojmë nga hotelet në janar në shtëpi me qira.”
Kërkoi nga kabineti solidarizim dhe angazhim të plotë për zonat e prekura nga tërmeti, atje ku kanë strehuar banorët, apo në fshat ku po qëndrojnë në çadra, por Kryeministri ka sqaruar se askush nga administrata nuk është i detyruar të japë para për të ndihmuar banorët e prekur.
“Refuzoj komplet atë shpifjen tjetër që me demek ne paskemi detyryar punonjësit të japin lekë nga rroga se nuk kemi lekë, asgjë nuk është bërë në mënyrë detyruese, të gjithë kanë qenë të ftuar të japin kontribut vullnetare. Ne i dhamë rrogën e nëntorit, punonjësit jo të gjithë kanë kontribuar dhe nuk ka problem, nuk ka asgjë me detyrim, por askush nuk duhet të dedikojë fond nga institucione buxhetore apo jo, publike, do e bëjmë me ligj të posaçëm, asnjë organ i qeverisjes vendore, ndërmarrje e shoqëritë tregtare me kapital 50% shtetëror, për Vitin e Ri për darka e për valle,” tha Edi Rama, duke theksuar se do të bëhet një ndryshim në vendimin për Fondin e veçantë, që ndalon rreptësisht përdorimin e Fondit të veçantë për veprimtari social-kulturore dhe shpërblime të punonjësve të institucioneve për Vitin e Ri. Madje kishte një porosi të prerë për qeveritarët:
“Organizohuni që të gjitha institucionet të ndajnë një pjesë të festave me njerëzit që janë atje, të shkojnë, të çojnë dhurata për fëmijët atje ku janë të kalojnë kohë me ta.”
Duke qenë i painformuar se çfarë ndodhi në Spitalin e Durrësit, kush ishte ai që urdhëroi vendosjen e shiritit të kuq pas tërmetit të pasdites me magnitudë 5.6 të shkallës Rihter, për çfarë raportuan drejtëpërdrejtë disa nga televizionet me korrespodent në terren, dhe ishinmjekët heroik që nuk pranuan daljen nga Spitali ku po vazhdonte fluksi I të lënduarëve, Kryeministri sot akuzoi mediat për shpifje madje edhe për vdekjen e një personi.
Shumë shpejt, tha Edi Rama, do të jetë gati klauzola në Ligjin e antishpifjes, për lajme të rreme në gjendje të jashtëzakonshme duke përsëritur se lajmet e rreme dhe që përhapin panik në situatë të jashtëzakonshme do të jenë të superdënueshme.
“Është e dënueshme shpifja dhe do të jetë e superdënueshme në situatë të jashtëzakonshme. Lajmet e rreme dhe lodrat mediatike në situata si kjo që kaluam janë kriminale. Mjafton rasti i Durrësit, një lajm kriminal i shpërndarë se po bie spitali i Durrësit, solli një të vdekur e pa llogaritur kaosin e të plagosurit në përpjekjen për të ikur nga Spitali pas lajmit se po shembej Spitali, kur Spitali nuk kishte asgjë”- tha ai.
