Mbledhja e tretë e Qeverisë së Kosovës, ja vendimet…

Në mbledhjen e saj të tretë Qeveria e Kosovës ka miratuar vendime të rëndësishme nga fushat e saj të përgjegjësive kushtetuese dhe ligjore deri te buxhetit për zgjedhjet e jashtëzakonshme për kryetar të Komunës së Podujevës por vendimi për heqjen e taksës ndaj produkteve serbe përkundër pritshmërive mbetet për tu marrë në një nga mbledhjet e radhës ashtu siç premtoi dhe Kryeministri Albin Kurti para prodhuesve shqiptarë.

Kështu, sot Qeveria e Kosovës ka miratuar Rregulloren e re për fushat e përgjegjësive të Zyrës së Kryeministrit dhe ministrive. Sipas kësaj rregulloreje përcaktohet organizimi i Qeverisë në bazë të votimit të kabinetit qeveritar me 3 shkurt 2020 nga Kuvendi i Kosovës dhe organizohet me 15 ministri. Kjo rregullore e organizimit të Qeverisë do të pasohet me miratimin e rregulloreve për organizimin e brendshëm të secilës ministri në të ardhmen e afërt.

Sot është miratuar edhe vendimi për shkarkimin e Bordit të Drejtorëve të Ndërmarrjes Publike “Telekomi i Kosovës” sh.a. Vendimi është mbështetur në Ligjin për ndërmarrjet publike dhe ka pasur parasysh funksionimin dhe gjendjen aktuale në këtë ndërmarrje publike, e vlerësuar si mjaft e rëndë dhe me nevoja për të ndryshuar konceptin menaxhues.

Qeveria sot ka miratuar edhe vendimin për krijimin e listës së tepricës me sekretarët e përgjithshëm të ministrive që preken nga riorganizimi i Qeverisë së Kosovës. Qeveria do të angazhohet në shqyrtimin e të gjitha mundësive për angazhimin e tyre në pozita ekuivalente, sipas Ligjit për Shërbimin Civil të Kosovës.

Në detyrën e Sekretarit të Përgjithshëm të Ministrisë së Infrastrukturës dhe Ambientit, Qeveria e Kosovës ka ricaktuar Izedin Bytyqin.

Është themeluar Këshilli Organizativ për shënimin e “Epopesë së UÇK-së”, me një vendim të miratuar sot nga kabineti qeveritar. Këshilli do të udhëhiqet nga zëvendëskryeministri Haki Abazi dhe do të ketë në përbërje ministrin e Mbrojtjes, përfaqësues nga: Zyra e Kryeministrit; Komuna e Skenderajt; Ministria e Kulturës, Rinisë dhe Sportit; Ministria e Punëve të Jashtme dhe Diasporës; Ministria e Punëve të Brendshme dhe Administratës Publike; Zyra e Presidentit; Familja Jashari; shoqatat e dala nga lufta e UÇK-së; Asociacioni i Komunave dhe përfaqësues nga shoqëria civile.

Me vendimin e miratuar sot nga Qeveria e Kosovës, është shfuqizuar vendimi për përfitimet e zyrtarëve të lartë pas përfundimit të mandatit të tyre.

Në parim janë miratuar sot nga Qeveria e Kosovës edhe nismat për negocimin e marrëveshjeve ndërkombëtare për ndihmë juridike dhe për ekstradim në mes të Republikës së Kosovës dhe Republikës së Francës.

Ministri i Financave dhe Transfereve ka njoftuar kabinetin qeveritar për pjesëmarrjen në Konferencën e donatorëve për mbështetjen e Shqipërisë në tejkalimin e gjendjes pas tërmetit të nëntorit të vitit të kaluar. Ministri ka theksuar se në emër të Kosovës janë zotuar 200 mijë euro, dhe ka vlerësuar se ndihma e gjithmbarshme e Kosovës ndaj Shqipërisë për sanimin dëmeve të tërmetit është më e madhja në proporcion me kapacitetet e saj.

Kërkesa e Komisionit Qendror të Zgjedhjeve për ndarje të buxhetit për mbulimin e zgjedhjeve të jashtëzakonshme për kryetar të Komunës së Podujevës gjithashtu është prezantuar nga Ministri i Financave dhe Transfereve. Ministri ka propozuar që kabineti qeveritar të refuzojë kërkesën për ndarjet buxhetore për paga dhe mëditje dhe të aprovojë vetëm kërkesat për shpenzimet për mallra dhe shërbime.