Mbledhja Shqipëri-Kosovë, firmosen 19 marrëveshje
Në mbledhjen e tetë të përbashkët të qeverive të Shqipërisë e Kosovës, u firmosën 19 marrëveshje e memorandume mirëkuptimi në fushën e arsimit, doganave, energjisë, bujqësisë, infrastrukturës rrugore, transportit, shëndetësisë, mbrojtjes e drejtësisë.
Si gjatë ditëve të qëndrimit në Kosovë edhe sot gjatë mbledhjes së dy qeverive, Kryeministri Edi Rama me përbuzje foli ndaj shumicës së ministrave kosovarë në veçanti ndaj Kryeministrit Albin Kurti të cilin disa herë e quajti me nofkën me të cilën e përqesh Batoni me shokë dhe e ka transferuar në mediat primitive që kontrollojnë: Bini! (figura komike e Britanisë, Mister Bin).
Pas marrëveshjeve, në arsim për mundësi konkurrimi dhe vijim të studimeve në 19 universitete të të dyja shteteve, në kushte të barabarta, lehtësimin e lëvizjes së lirë mes dy shteteve duke filluar me fundjava dhe sozeonin turistik deri në lehtësimin e plotë, platformën e përbashkët digjitale për promovim të turizmit të të dyja vendeve, në transport me marrëveshjen për një studim fizibiliteti që i hap rrugën ndërtimit të linjës hekurudhore Durrës – Prishtinë, Kryeministri i Kosovës, Albin Kurti, ka bërë thirrje për besim të ndërsjellë social.
“Vendet tona nuk i bën bashkë interesi, por është në interesin tonë që të qëndrojmë bashkë. Aq sa na bashkon historia, gjuha dhe kombi, aq duhet të na lidhë bashkëpunimi institucional në çdo fushë,” tha Kurti ndërsa Rama e vlerësoi bashkëpunimin me bilanc pozitiv.
“Nuk e ekzagjeroj fare po të them se pas çdo mbledhjeje të përbashkët, ne i afrohemi pak më shumë qëllimit të madh të dokumentit të Partneritetit Strategjik mes dy shteteve tona, të nënshkruar në Prizren më 2014,” tha Edi Rama ndërsa gjeti momentin ti përgjigjet atyre që raportuan mbi mosmarrëveshjet dhe mungesë të ecurisë mes punës së të dyja qeverive.
“Me qeverinë aktuale ne kemi shkallën më të lartë të zbatimit të marrëveshjeve të nënshkruara, përfshirë edhe marrëveshjet e nënshkruara në të kaluarën. Shpresoj që ky të konsiderohet fakt dhe jo arsye për të bërë spekulime të natyrës politike, sepse unë jam tërësisht i papërfshirë dhe i painteresuar të përfshihem në jetën politike të Kosovës,” tha Kryeministri Edi Rama ndonëse ndaj qeverisë së Albin Kurti ka ushtruar përbuzjen më të madhe si me asnjërën qeveri më parë!
Ndryshe, këto janë Marrëveshjet e firmosura mes qeverive të Shqipërisë e Kosovës, sot në Prishtinë:
1.Marrëveshje bashkëpunimi për pranimin e studentëve në institucionet e arsimit të lartë të Republikës së Shqipërisë dhe Republikës së Kosovës.
2.Protokoll për implementimin e kontrollit të përbashkët kufitar në pikën e përbashkët të kalimit kufitar Morinë/Kukës.
3.Protokoll për regjimin e trafikut lokal të kufirit në zonat kufitare ndërmjet kufirit shtetëror të Republikës së Shqipërisë dhe Republikës së Kosovës.
4.Memorandum bashkëpunimi për ngritjen e një grupi të përbashkët pune për bashkim doganor.
5.Marrëveshje administrative për zbatimin e marrëveshjes për sigurime shoqërore.
6.Memorandum mirëkuptimi për sektorin e energjisë.
7.Memorandum bashkëpunimi për bashkëpunim mbi zhvillimin e terminalit të Vlorës.
8.Marrëveshje bashkëpunimi në fushën e zbatimit të programeve të mbështetjes për bujqësinë dhe zhvillimin rural.
9.Memorandum mirëkuptimi për bashkëpunim në fushën e gjendjes civile.
10.Marrëveshje bashkëpunimi për shkëmbim përvojash në proceset teknike.
11. Marrëveshje bashkëpunimi për vlerësimin e gjendjes dhe përmirësimin e rrugëve të fshatrave ndërkufitare që lidhin zonat kufitare Shqipëri-Kosovë.
12.Marrëveshje bashkëfinancimi për studimin e fizibilitetit dhe projekt – idesë për lidhjen hekurudhore Durrës-Prishtinë.
13. Marrëveshje për bashkëpunimin në fushën e shëndetësisë për shërbimin e ndërsjelltë ndërkufitar.
14.Marrëveshje për bashkëpunimin në fushën farmaceutike dhe të pajisjeve mjekësore.
15.Marrëveshje bashkëpunimi për krijimin e një platforme të përbashkët digjitale të informacionit dhe promovimit turistik.
16.Marrëveshje për bashkëpunim në fushën e rinisë.
17.Marrëveshje për bashkëpunimin në fushën e kërkim shpëtimit malor dhe ujëra territoriale.
18.Deklaratë e përbashkët e Ministrave të Drejtësisë të Republikës së Shqipërisë dhe Republikës së Kosovës.
19.Marrëveshje bashkëpunimi për bashkëfinancimin e projektit madhor në albanologji enciklopedia shqiptare.
