Mbrojtja e Teatrit Kombëtar, nga pasditja e sotme instalohen çadrat para godinës…

Artitët, aktorët, shoqëria civile dhe qytetarët që kundërshtojnë qeverinë Rama në nismën për prishjen e godinës së Teatrit Kombëtar, nga ora 19:00 e ditës së sotme do të instalojnë çadra në sheshin para institucionit kulturor, si formën më të mirë për mbrojtjen e tij.

Çadrat do të jenë të instaluara deri në plotësimin e kërkesave të tyre. Vendimi i aktorëve dhe artistëve u bë publik pas dështimin të dëgjesës të organizuar dje, nga kryebashkiaku Erion Veliaj.

“Artistët nuk mashtrohen nga deklaratat e zyrtarëve nën nivelin e kryeministrit. Me këtë rast ne deklarojmë se takimi nuk solli asnjë rezultat konkret dhe se palët kanë pozicione diametralisht të kundërta.

Ne do të vazhdojmë luftën tonë kundër aleancave mafioze të pushtetit me biznesin, derisa qeveria të tërhiqet përfundimisht nga ky projekt-ligj dhe t’i hapë rrugën dialogut për rindërtimin e teatrove kombëtare, dyfishimin e buxhetit të kulturës dhe miratimin e ligjeve demokratike për artin në përgjithësi dhe teatrin në veçanti”, thuhet në një deklaratë për shtyp të Aleancës për Mbrojtjen e Teatrit.

Qeveria ka paraqitur një pr/ligj që i hap rrugën prishjes së godinës aktuale të Teatrit Kombëtar dhe i hap rrugën ndërtimit të një kopleksi me kulla, pranë të cilave do të ndërtohet edhe një teatër i ri. Kompania që pritet të bëjë ndërtimet, nëse ky plan miratohet në Kuvend, është firma Fusha shpk, e njëjta që ndërtoi sheshin Skenderbej.