Mbron Taulant Ballën/ Reagimi, Basha: Edi Rama mashtron për të mbrojtur pushtetin e tij të lidhur me krimin

Edi Rama gënjen paturpësisht për të mbrojtur krimin e Taulant Ballës në policinë e Fushë Krujës. Kështu reagon kryetari i Partisë Demokratike, Lulzim Basha përmes rrjetit social Facebook, pas mbrojtjes që Edi Rama i bëri Taulant Ballës gjatë një interviste televizive ku insistonte se ishte Balla ai që e bëri publike këtë rast:

“Taulant Balla e nxori vetë këtë gjë, doli vetë në media dhe lexoi
letrën e atij,” u shpreh kryeministri duke folur për letrën e
Emiljano Nuhut, dërguar Drejtorit të Policisë së Shtetit, ku i
shpjegonte “rastin Xhisiela” dhe se si ishte kërcënuar në stacionin
policor të Fushë-Krujës nga eksponentë të lartë të PS-së.

“Pasi u publikua intervista e tij,” ndërhynë gazetari.

“Si mo pasi u publikua, e dini ju kronologjinë e ngjarjes apo jo, Taulant Balla po të them,” shton kryeministri sikur është i bindur edhe pse ngjanë se është jashtë realitetit.

Alibia e Edi Ramës për Taulant Ballën nuk qëndron, thekson Lulzim Basha, duke saktësuar se intervista e Nuhut u transmetua në Shijak TV në orën 13:46, ndërsa Balla doli në deklaratë për mediat më 15:06.

“Sa herë kapet në krim, Edi Rama mashtron për të mbrojtur pushtetin e tij të lidhur me krimin,” thekson kyetari i Partisë Demokratike, Lulzim Basha duke përfunduar:

“Politikanët e lidhur me krimin duhet të largohen. Veting në politikë pa vonesë!”