“Mbron vrasësin e Oliver Ivanoviçit”, Gjermania përgënjeshtron ministrin e Brendshëm të Serbisë
Ambasada gjermane në Prishtinë ka përgënjeshtruar pretendimet e ministrit të Brendshëm të Serbisë, se Gjermania ka nën mbrojtje një person, që Beogradi dyshon se ka vrarë politikanin serb nga veriu i Kosovës, Oliver Ivanoviç.
Ambasada gjermane tha për RFE se nuk ka dijeni se kush e ka vrarë Ivanoviçin më 16 janar 2018.
“Deklaratat që thonë se dorasi është nën mbrojtjen e autoriteteve gjermane nuk janë të vërteta. Qeveria gjermane nuk ka pranuar asnjë kërkesë nga autoritetet serbe për këtë çështje,” u tha në përgjigje.
Dje, ministri i Brendshëm i Serbisë, Bratislav Gashiç, tha se autoritetet serbe “e dinë saktësisht” se kush e ka vrarë Oliver Ivanoviçin dhe se policia serbe ka kërkuar nga autoritetet gjermane këtë person “nën mbrojtjen e të cilëve ai është”.
“Ne kemi një video nga aeroporti i Tiranës, kemi fotografi nga Prishtina, kemi fotografi që shfaq atë duke hyrë në një banesë në Prishtinë,” tha Gashiç, pa ofruar detaje apo dëshmi të tjera për të mbështetur këto pretendime.
Kjo nuk është hera e parë që autoritetet serbe deklarojnë se e dinë emrin e vrasësit të Ivanoviçit.
Më 2019, presidenti i Serbisë, Aleksandar Vuçiç, përmendi emrin e shqiptarit nga Kosova, Florim Ejupi, i cili jeton në Gjermani.
Vuçiç kërkoi nga ndërkombëtarët se pse autoriteteve hetuese të Serbisë nuk po iu jepen pamjet e kamerave nga aeroporti i Tiranës, për, siç tha ai, “lëvizjen sekrete të personit të quajtur Florim Ejupi, i cili është nën vëzhgim në Gjermani”.
“Çfarë po bënte ai në aeroportin e Tiranës. Ai më pas lëvizi drejt Kosovës dhe u zhduk përsëri, e sërish po kthehej në Gjermani nga po i njëjti aeroport,” deklaroi Vuçiç më 3 korrik 2019.
Sipas mediave në Kosovë dhe Serbi, Florim Ejupi më pas kishte njoftuar policinë gjermane se emri i tij është lidhur me vrasjen e Oliver Ivanoviçit, por autoritetet gjermane i thanë atij “që të mos shqetësohej për atë rast”.
Sipas Fondit për të Drejtën Humanitare, në vitin 2008, Florim Ejupi ishte dënuar me 40 vjet burgim për një sulm me një mjet shpërthyes në autobusin e Nish Ekspres në afërsi të Podujevës.
Megjithatë, në shkallën e dytë, trupi gjykues i Gjykatës Supreme në Kosovë më 2009 e liroi Ejupin nga akuzat “për mungesë provash”.
Sulmi ndaj autobusit kishte ndodhur më 2001, kur ishin vrarë 11 civilë serbë.
Ndryshe, Ivanoviç u vra me gjashtë plumba në shpinë para selisë së partisë së tij në Mitrovicë të Veriut – një prej katër komunave në veri të Kosovës, të banuara me shumicë serbe.
Mbi pesë vjet pas kësaj vrasjeje, rasti ende nuk është ndriçuar.
Kosova dhe Serbia kanë kryer hetime për këtë rast.
Prokuroria Speciale e Kosovës deri më tani ka ngritur tre aktakuza, por në to nuk ka pasur ndryshime thelbësore, gjegjësisht përmenden vetëm personat që “me vetëdije dhe qëllim kanë ndihmuar grupin kriminal për kryerjen e veprës penale të vrasjes së Oliver Ivanoviçit”, por jo autori i vrasjes apo porositësi.
Aktakuza, raporton RFE, janë ngritur ndaj zyrtarëve policorë Nedelko Spasojeviç, Radeta Basara, Zharko Jovanoviç, por edhe ndaj sekretares së Ivanoviçit, Silvana Arsoviç dhe Marko Roshiç, qytetar i Mitrovicës së Veriut.
Më 19 tetor 2022, Policia e Kosovës arrestoi pjesëtarin e komunitetit serb, M.M, nën dyshimet se ai është anëtar “i një grupi të organizuar kriminal” të lidhur me vrasjen.
