Mbyllen 32 mijë biznese, Basha: Kjo krizë e thellë, rezultat i dështimeve të Edi Ramës!

Të paktën 100 mijë shqiptarë kanë humbur vendin e punës për shkak të 32 mijë bizneseve të mbyllura këtë vit, shprehet Kryetari i Partisë Demokratike, Lulzim Basha, ndërsa citon një Studim të Bankës Botërore, sipas të cilit, 6 në 10 biznese të regjistruara në Shqipëri nuk kanë realizuar asnjë fitim pas heqjes së masave bllokuese, çka paralajmëron të tjera falimentime dhe mbyllje vendesh pune.

“Kjo krizë e thellë është rezultat i 7 viteve me premtime të pambajtura, dështime dhe keqqeverisje. 7 vite me radhë Edi Rama ka rritur taksat dhe çmimet, ndërsa paratë e shqiptarëve i ka vjedhur e shpërdoruar me një grusht oligarkësh, përmes PPP-ve, koncesioneve dhe tenderave korruptivë,” thekson Lulzim Basha duke shtuar se të njëjtat akte korruptive dhe demagogji Edi Rama po përdor dhe për rindërtimin, ndërkohë familjet e dëmtuara po bëhet gati një vit që jetojnë në çadra, kontenierë apo shtëpi të rrënuara.

“Vendi ka nevojë për ndryshim, për frymëmarrje dhe model të ri ekonomik që mund ta sigurojë vetëm një qeverisje ndryshe. Me planin tonë ekonomik ne do të ulim taksat.”

Taksa e sheshtë 9%, mbështetja për biznesin e vogël, moratoriumi për inspektoriatet dhe taksidarët dhe masa të tjera, do të çlirojnë biznesin nga ankthi, thotë Kryetari i Partisë Demokratike, Lulzim Basha, duke përfunduar:

“Do të krijojmë mundësi për çdo shqiptar të punojë e jetojë me dinjitet në vendin e tij.”