Mbyllen Lojërat Olimpike “Tokyo 2020”, Kosova e 42-ta, Shqipëria pa medalje
Lojërat Olimpike “Tokyo 2020” u shpallën të mbyllura më 8 gusht nga shefi i Komitetit Olimpik Ndërkombëtar, Thomas Bach. Ai tha se ngjarja sportive 16-ditore i kishte sjellë botës njëfarë shprese gjatë pandemisë koronavirusit.
“Që nga fillimi i pandemisë, për herë të parë e gjithë bota u bashkua. Ne epiqendër u kthye sporti. Duke ndarë momente gëzimi dhe frymëzimi, miliarda njerëz në të gjithë globin u bashkuan përmes emocioneve”, tha Bach në fjalën e tij gjatë ceremonisë përmbyllëse që zgjati rreth dy orë.
“Kjo na jep shpresë për të ardhmën, na jep besim”, tha Bach duke mbyll zyrtarisht Olimpiadën 2020, duke shënuar edhe fundin e udhëtimi olimpik që është vlerësuar si ndër më sfiduesit për shkak të pandemisë së COVID-19. Bach falënderoi gjithashtu organizatorët japonezë dhe mijëra vullnetarë që u angazhuan në përgatitjen e tyre.
Shqipëria nuk arriti të marrë medalje, edhe pse konkurroi me 7 sportistë. Kosova u rendit në vendin e 42-të me dy medalje të fituara, të dyja në xhudo e me gjithsejtë 11 sportistë. Në renditjen e përgjithshme të vendeve pjesëmarrëse SHBA u rendit e para me 39 medalje të arta, 41 të argjendta dhe 33 të bronzta.
Dy xhudistet e Kosovës, Distria Krasniqi dhe Nora Gjakova morën dy medalje të arta në këto lojëra. Kjo ishte hera e dytë që Kosova mori pjesë në Lojërat Olimpike, ku në Rio më 2016, xhudistja Majlinda Kelmendi fitoi medalje të artë në kategorinë e saj.
Sot, në ditën e fundit, Shtetet e Bashkuara shënuan fitore në volejboll, çiklizëm në pistë dhe basketboll për femra duke dalë në vendin e parë me 39 medalje ari, vetëm një përpara Kinës.
Medalja e 339 -të dhe e fundit e artë shkoi për ekipin e vaterpolit për meshkuj të Serbisë.
Garat u zhvilluan në kushte të rrepta të kufizimeve kundër koronavirusit. Lojërat ishte paraparë të mbahen vitin e kaluar, por ato u shtynë për shkak të pandemisë. Organizatorët duket se e kanë parandaluar rrezikun që ky organizim të jetë një arsye e përhapjes së koronavirusit, edhe pse rreth 50,000 njerëz u mblodhën pavarësisht pandemisë.
Tridhjetë e tre sporte janë zhvilluar në stadiume kryesisht të zbrazëta dhe sportistët kanë jetuar gjatë këtyre ditëve në kushte të rrepta për të parandaluar përhapjen e koronavirusit.
Lojërat Olimpike Verore 2024 do të mbahen në Paris të Francës./RFE/
