Mbyllja e sallave të Urgjencës/ Reagimi i Kirurgëve, Shehu: Po dëmtohen pacientët!
Pasi kirurgët më të njohur në vend i janë drejtuar Ministrisë së Shëndetësisë me një kërkesë për të mos zhvendosur plotësisht sallat e operacionit të Urgjencës, ka reaguar edhe Ish-Ministri i Shëndetësisë dhe reanimatori i njohur shqiptar, Prof.Dr. Tritan Shehu i cili duke mbështetur kërkesën e kirurgëve thekson se kemi të bëjmë me vendim arbitrar që dëmton pacientët.
“QSUT, kirurgjia po ngre zërin kundër vendimeve arbitrare, jo profesionale e dëmtuese të shërbimit ndaj pacientit. Është krejt i drejtë e racional dokumenti i hartuar e firmosur nga Departamenti i Kirurgjisë, përballë aktit të pashembullt të mbylljes së dy sallave të urgjencës duke dëmtuar shërbimin, pa asnjë konsultim me ata që punojnë, njohin mirë rregullat e ekzigjencat e atij profesioni, i shërbejnë me përkushtim pacientët në kushte të vështira e deri diskriminuese.”
Ashtu siç e kam ngritur prej kohësh, thekson Prof.Dr.Tritan Shehu në reagimin e tij përmes rrjetit social Facebook, shkatërrimi gradual i asaj Urgjence Polivalente, një investim i madh e cilësor i përfunduar me 2012 po vazhdon tashmë me eliminimin e bllokut kirurgjikal të saj, për tu përfunduar me copëzimin e Urgjencës nga zhvendosja e një pjese të saj tek godina në ndërtim e Sëmundjeve të Brendshme.
“Të gjitha këto vendime arbitrare, së bashku me uljen drastike të kapaciteteve të kirurgjive, pa asnje konsultë e diskutim me specialistët, ndesh dhe me Strategjinë e zhvillimit të QSUT të miratuar në mënyrë transparente, dëmtojnë rëndë atë shërbim në nivel kombëtar, cilësinë e atij ndaj pacientëve, pa folur këtu për dëmin ekonomik,” thekson Ish-Ministri i Shëndetësisë, Prof.Dr.Tritan Shehu duke përshëndetur reagimin e përgjegjshëm të kolegëve të kirurgjisë, pa të cilët nuk mund të ndërmerren të tilla hapa, sepse kur arbitrariteti vendoset para profesionalizmit, jo vetëm ndalon zhvillimin por çon në shkatërrim.
