Mbytet varka me emigrantë në Kanalin Anglez, 4 të vdekur

Katër persona kanë humbur jetën pasi një varkë e vogël me emigrantë që përpiqeshin të kalonin Kanalin Anglez dhe të arrinin në Britani, u mbyt. Një operacion i gjerë kërkim-shpëtimi është duke u zhvilluar, konfirmuan sot autoritetet lokale franceze.

“Një ‘taxi-anije’ u mbyt sot. Numri i viktimave është ende duke u përcaktuar dhe të dhënat mund të ndryshojnë,” thuhet në një deklaratë nga autoritetet lokale në Calais, raporton Agjencia e lajmeve Reuters.

Kontrabandistët përdorin “taxi-anije”
Kontrabandistët e qenieve njerëzore kanë përdorur gomone që nga viti i kaluar për të mbledhur emigrantë nga bregu përgjatë bregdetit verior të Francës dhe Belgjikës. Anijet e tilla, autoritetet i pagëzuan “taxi-anije”.

Ndryshe, sipas të dhënave nga Observatori i Migracionit i Universitetit të Oxfordit, në dy muajt e parë të këtij viti, rreth 2.200 emigrantë kaluan Kanalin Anglez, një nga rrugët ujore më të ngarkuara në botë, për të arritur në Britani.

Gjatë vitit të kaluar, rreth 41.500 njerëz kaluan kanalin.