Më 14 shkurt fiton Albini! Po pastaj…
nga Agim Popoci
Më 14 Shkurt mbahen zgjedhjet parlamentare në Kosovë dhe për herë të parë pa u mbyllur kutitë e votimit mund të shpallet fituesi i këtyre zgjedhjeve, Lëvizja Vetëvendosje! Po çfarë pastaj…
Më 15 Shkurt, Kosova do të ketë një fitues të zgjedhjeve parlamentare i cili ngadhënjeu përballë rivalëve politik që e shkërmoqën Kosovën duke e vjedhur për 20 vjet; Por, gjithashtu do të kemi një fitues i cili edhe në vitin 2019 fitoi zgjedhjet parlamentare dhe dështoi për 50 ditë!
Pse me plotë gojën ky cilësohet dështim dhe asgjë tjetër?! Që Lidhja Demokratike e Kosovës arriti me paligjshmëri të largoi Qeverinë Kurti kjo pak rëndësi ka sepse populli në zgjedhjet e vitit 2019 nuk i besoj LDK-së qeverisjen, dhe partnerin e zgjodhi vetë Lëvizja Vetëvendosje me në krye Albin Kurtin!
Më 15 shkurt, meqë fituesi nuk kontestohet, domosdo shtrohet pyetja se a e ka luksin Kosova ti lejoj një idioti si Isa Mustafa të vazhdoj të bëjë eksperimente me këtë vend, dhe e ka luksin ky shtet të pësoj edhe nga gabimet tjera që mund të bëjë qeverisja e Albin Kurtit. Pse?!
Albin Kurti u zotua se nuk do të lejoj përsëritjen e 25 Marsit 2020. Si?!
Meqë do të ishte e padrejtë sikur gjithë fajin për këtë ditë tragjike t’ia lëmë analfabetit politik, Isa Mustafa me LDK-në, ndonëse pas vendimit të Gjykatës Kushtetuese u pa qartë se ishte fut në këtë aventurë politike me vetëdije të plotë, duhet të jemi të sinqertë dhe të themi se Isa e bëri këtë pisllëk politik sepse kjo u tolerua nga Albin Kurti.
Rrethanat që çuan në rrëzimin e Qeverisë Kurti dhe shkaktuan viktima dhe pasoja të mëdha shëndetësore për shkak të pandemisë, me gjithë kompleksitetin duhet të jenë udhërrëfyesi i Albin Kurtit për të krijuar qeverinë e re në mënyrë që të mos përsëritet loja e rrezikshme me LDK-në.
Deri te 25 Marsi 2019 Albin Kurti dështoi në krijimin e një koalicioni për Kosovën i cili duhet ti kishte të qarta shtyllat e politikës së jashtme dhe ato të sigurisë, si dhe raportin me Tiranën zyrtare. Dhe, këtu nuk i ka faj as Hashimi dhe as Isa!
Në momentin e lëvizjeve të forta gjeopolitike në botë, kur përplasjet SHBA-Gjermani kishin arritur kulmin dhe Albin Kurti fitoi zgjedhjet e vitit 2019, duhet të mendonte për dy figura të forta, që ti besonte diplomacinë dhe integrimin. CV-të që ai i ka konsultuar janë e kaluara e njerëzve me të cilët mund të hap një Universitet të Diplomacisë në Kaçanik ose Gradec, por në asnjë mënyrë t’iu besohet një post kaq i rëndësishëm i një qeverie nga e cila populli dhe ndërkombëtarët kishin shumë pritshmëri. Nëse kësaj i shtojmë edhe performancën mediatike të takimeve me ish-ministrin më të dështuar të diplomacisë shqiptare, Ditmir Bushati, atëherë situata ishte serioze dhe përfundoj si e tillë me një fiasko jo të papritur!
Hyrja në Zyrën e Kryeministrit pa e pasur parasysh pozitën e Kosovës në Procesin e Berlinit dhe micsokolizmi karshi SHBA, ishte një paralajmërim për goditjen që do të pësoj Kosova! Kështu dhe ndodhi; Dhe pak rëndësi kishte tashmë se kush ishte ministër i Jashtëm ose i Integrimit, kur dhe partnerët strategjik u ngatërruan nga Prishtina zyrtare!
Mitizimi i Ambasadorit Grenell dhe komentet denigruese të twitteve të diplomatit amerikan nga një lukuni sejmenësh që me të njëjtën monedhë denigrojnë Isën dhe Buzhalën, është dhe gabimi tjetër i pafalshëm që nuk duhet të përsëritet po aq sa 25 Marsi.
Takimi me llumin mediatik të Tiranës ishte gabimi i radhës së Albin Kurtit jo vetëm pse ata janë ekstremisht të majtë! Trajektorja e ngritjes së Edi Ramës dhe qëndrimit në pushtet, pavarësisht shijeve politike në Vetëvendosje, duhet ti shërbej Albin Kurtit jo për tu ngjitur në pushtet sepse nuk ka rival si Rama, por si të mos lëviz kolltukun e Kryeministrit nga ndërkombëtarët për të realizuar qëllimet programore! Llumi të cilin ai e takoi në “darkën e gabuar” i ndihmoi Ramës vetëm në luftën me Sali Berishën, të cilin e denigruan jo në masën që ata dëshironin, por aq sa u lejuan nga pronarët e mediave ku punonin, përkatësisht Edi Rama. Me ardhjen në pushtet, Kryeministri Edi Rama ata i hodhi aty ku e kishin vendin, në kazan! Dhe, aty nuk ka pse fut duart Albin Kurti! Ama duhe të hap sytë dhe të analizoj rrugën e Edi Ramës nga intervista denigruese në CNN kundër kandidatit për president Donald Trump deri te investimi amerikan në HEC-in e Skavicës prej 500 mln eurosh me Donald Trumpin, President i SHBA!
Jo për gjë, por që të mos i përsëritet 25 Marsi!
Të gjithë e përshkruan në mënyrën e vet incidentin me Agim Veliun por ajo që ndodhi me Ministrinë e Brendshme ishte asgjë më shumë se sa keqmenaxhim i sigurisë shtetërore. Kapadaillëku i Presidentit Hashim Thaçi në vendkalimin kufitar Morinë tregoi se jo vetëm që nuk kishte shtet por as Albin Kurt! Dhe, për këtë dhe shumë arsye tjera, ishte e domosdoshme që e gjithë piramida e sigurisë po atë natë të futej në sitë, ishte apo jo Agim Veliu ministër.
Kjo ishte dhe njëra nga arsyet e forta pse kulla e kësaj qeverie u rrëzua nga brenda! Nëse i shtojmë këtu dhe luftën që shërbimi sekret AKI i bënte Kryeministrit Albin Kurti, kur ai filloi zbërthimin e bordeve kriminale dhe nepotizmit në administratën shtetërore, situata ishte më shumë se alarmante!
Nëse kjo situatë nuk kurohet edhe pas 15 Shkurtit, 25 Marsin e ka te pragu i Qeverisë!
Që të mos krijohet ideja e një situate të pashpresë edhe pas 15 Shkurtit është ministri i Shëndetësisë, Arben Vitia! Edhe pak ditë bëhet viti që kur Kryeministri i paligjshëm Avdullah Hoti erdhi në detyrë. Në një shtet normal, ky do të përfundonte në pranga nëse për asgjë tjetër për vijimësinë e menaxhimit që ndërpreu në kulmin e pandemisë. Ministri Vitia dhe besimi i Kryeministrit Albin Kurtit karshi këtij profesionisti ishte shembulli më i mirë si mund të menaxhohet edhe një situatë e rëndë si ajo me COVID-19. Gjatë këtyre ditëve, menaxhimi i situatës ishte model për të gjithë Ballkanin, dhe si nuk duhet të punohet u pa me rrëzimin e qeverisë kur Hoti u bind se ishte doktor edhe në fushën e mjekësisë! Rasti i i fundit me lehtësimin e masave dhe mospërfilljen e ekspertëve dëshmoi se sa mirë e menaxhoi këtë situatë vetë Albin Kurti.
Dhe në fund, të gjithë në Kosovë mund të ëndërrojnë mbi veprimet e Presidentit të ri SHBA, Joe Biden, por jo dhe Kryeministri. Ata që menduan se Biden do ta gris Marrëveshjen e Washingonit sapo të futet në Shtëpinë e Bardhë tashmë e kanë të qartë se e kishin shumë gabim, dhe këtë e konfirmoi Sekretari i Shtetit.
Si para 25 Marsit 2020 edhe më 15 Shkurt kur të fitoi zgjedhjet, Albin Kurti nuk duhet të konsumojë shumë energji për veprimet e Amerikës dhe hartat që ajo bënë! Ama duhet të lexoj shumë, për të kuptuar se as Presidenti i SHBA, Donald Trump, nuk e zbërthei dot Departamentin e Shtetit ndonëse konsumoi shumë energji. Themelet e këtij Departamenti nuk lëvizën ndaj Kosovës ndonëse kaluan shumë ujëra dhe grenellë të ndryshëm me ide të përçudnuara nga Berlini në Bruksel.
Për të qenë i qetë në punën e tij duke mos menduar në përsëritjen e 25 Marsit, Albin Kurti duhet ta harroj se gjatë këtij mandati qeverisës mund të përcaktohet statusi përfundimtar i Kosovës.
Jo pse këtë e thotë Presidenti i Serbisë, Aleksandar Vuçiç se atë nuk e pyet njeri, por për shuarjen e këtij zjarri nuk janë të interesuar zjarrëfikësit e globit! Nëse Albin Kurti si Kryeministër i Kosovës arrin ti hedhë ndonjë kovë me ujë, nuk bënë keq…
