Më 18 Maj hapen plazhet e Ulqinit, në 16 m² dy shezllone dhe një çadër plazhi

Sekretari i shtetit në ministrinë e Zhvillimit të qëndrueshëm dhe Turizmit të Malit të Zi, Damir Davidoviç ka treguar për risitë që në plazhe gjatë këtij viti duke përfshirë edhe Ulqinin ndërsa shton se do të jenë epidemiologët ata që do të vendosin kur do të hapen kufijtë.

Për TV Prva ai sqaroi se është planifikuar që më 18 Maj të hapen të gjitha objektet hotelerie në Mal të Zi dhe se tashmë janë përgatitur standarde shëndetësore që do të duhet të sigurohen për funksionimin e tyre të sigurt.

“Ne të gjithë synojmë mbrojtjen e shëndetit, dhe ne jemi mësuar tashmë me standardin e ri të distancës sociale që do të mbetet kështu derisa të vihen në dispozicion vaksinat,” tha Davidoviç duke shtuar:

“Do të jetë një lloj turizmi i ri, i kontrolluar.”

Ndërkohë, Ulqini Online raporton se Davidoviç sqaron se çka do të thotë turizëm i kontrolluar:

“Në 16 m² plazh, dy shezllone dhe një çadër pazhi do të lejohen, dhe e njëjta do të jetë edhe për ata që duan të qëndrojnë në peshqirët e tyre,” tha Davidoviç duke saktësuar se shezllonet dhe pajisjet tjera do të dezinfektohen çdo ditë sepse dëshira e të gjithëve është “të ndjehen të sigurt, por edhe të mbajnë ndjenjën e pushimit”.

Ndryshe, sezoni në Ulqin vlerësohet se nuk do të preket në masë të madhe duke ditur që mysafirët kryesor dhe në masën më të madhe në këtë qytet tursitik janë nga vendet fqinje.