Më 29 korrik, Samiti i liderëve të Ballkanit Perëndimor

Përfaqësuesit e vendeve të Ballkanit Perëndimor do të marrin pjesë në Samitin virtual të organizuar nga Këshilli Atlantik të mërkurën, më 29 Korrik.

Pjesëmarrës në Samitin për partneritetin e Ballkanit Perëndimor, thekson Këshilli Atlantik, do të jenë Kryeministri Edi Rama, kryeministri i Kosovës, Avdullah Hoti, Kryeinistri i BeH, Zoran Tegeltija, presidenti i Serbisë, Aleksandar Vuçiç, presidenti i Maqedonisë Veriore, Stevo Pendarovski ndërsa Mali i Zi përfaqësohet me ministren e Ekonomisë, Dragica Sekulic..

Temat e samitit, raporton RFE, do ti kushtohen përmirësimit të bashkëpunimit ekonomik rajonal.

“Ndikime ekonomike dhe sociale të pandemisë COVID-19 në Ballkan kërkojnë veprime urgjente rajonale, në mënyrë që të shmangin ngecjen e përhershme ekonomike dhe paqëndrueshmërinë e mundshme që vjen me të,” thekson Këshilli Atlantik përmes një deklarate duke përfunduar:

“Masat e dakorduara në Samit – të lidhura dhe të integruara me nismat dhe dialogun ekzistues rajonal – do të dërgojnë një mesazh të rëndësishëm politik për të ardhmen euro-atlantike të Ballkanit Perëndimor në një kohë të pasigurisë së shtuar.”

Ndryshe, Këshilli Atlantik është një qendër e politikës së jashtme me bazë në Washington.