Në LDK thonë se pas një debati, do të votohet një rezolutë që i ndalohet kujtdo që të bëjë pazare me territorin e Kosovës.

PDK e sheh këtë si konsum ditor, përderisa kryeministri Haradinaj sërish ka përkrahur kërkesën për këtë seancë. Pozitë e opozitë janë bërë bashkë, përveç PDK-së.

Kryeministri Ramush Haradinaj sërish ka folur për fazën finale te dialogut me Serbinë.

Ai tha se Kosova dhe Serbia duhet të arrijnë marrëveshje obliguese ndërkombëtare, por që tërësia territoriale e Kosovës nuk do të preket.

Haradinaj i ka dhënë mbështetje të plotë iniciativës së opozitës për seancë të jashtëzakonshme të Parlamentit për çështjen e integritet territorial.

Në vijë të njëjtë me kryeministër është edhe partia e tij AAK si dhe partia tjetër në pushtet Nisma Social Demokrate e Kosovës. Që të dyja këto subjekte politike kanë përkrahur kërkesën e LDK, Vetëvendosje dhe PSD që përmes një debati dhe rezolute në Kuvend t`i ndalohet secilit që të flas për shkëmbim territoresh apo edhe ndarjen e Kosovës.

Por zyrtarë të PDK këtë iniciativë të partive në opozitë po e vlerësojnë si konsum ditorë politikë.

Memli Krasniqi shef i GP të PDK tha se para se kjo seancë të ndodh, është dashur që të arrihet një konsensus ndërmjet partive politike dhe të krijohet një platformë e qartë për dialogun Kosovë-Serbi.

Në PDK thonë se askush nuk ka të drejt të flas për kufijtë e Kosovës, pa miratimin e Parlamentit, përderisa LDK kërkon zgjedhje të parakohshme.