Më 6 Mars, Bardh Spahia: Të shpëtojmë Shkodrën dhe të mbajmë me dinjitet shpirtin e saj të lirisë!

Kandidati i koalicionit “Shtëpia e Lirisë” për Shkodrën, Bardh Spahia, tha në tubimin përmbyllës për zgjedhjet e 6 marsit tha se të dielën do vendosim a do të mbetet Shkodra zemra e demokracisë.

Edi Rama bëri gjithçka që t’i ndalojë kohën Shkodrës në këto 8 vite, tha Bardh Spahia, duke i bërë thirrje shkodranëve që me 6 Mars të shpëtojnë Shkodrën dhe të mbajnë me dinjitet shpirtin e saj të lirisë.

Ndërsa lideri historik i PD, Sali Berisha premtoi se me mbështetje të fuqishme të miqve të Shkodrës në Europë dhe në botë, do të realizojë një sërë projektesh të cila shtrihen nga Thethi, Velipoja, qyteti dhe çdo skaj i këtij rrethi.

“Vendimet do merren me shkodranët, në interesin e tyre. Kjo fitore duhet të jetë për të gjithë qytetarët, në veçanti për rininë. Do punojmë së bashku që Shkodra mos të zbrazet nga të rinjtë. Nga qyteti i papunësisë, duhet të bëhemi kryeqendra e zhvillimit teknologjik.

“Do ofroj një model të ri, s’ka privilegj më të madh për mua se t’i shërbej Shkodrës. Nuk shikoj ngjyrat e partive politike, por Shkodrën e përbashkët. Forca jonë është tek bashkimi ynë. Shkodra është frymëzimi dhe qëndresa e të parëve për të përmirësuar jetën tonë. Nga Velipoja në majët e Dukagjinit të behemi bashkë për ndryshimin e madh dhe më pas në gjithë Shqipërinë. Shkodrës i duhet vota juaj për ‘Shtëpinë e Lirisë’. Të mbajmë rininë me shkollim dhe punësim,” tha Bardh Spahia i bindur se Shkodra nuk dorëzohet:

“Të shpëtojmë Shkodrën dhe të mbajmë me dinjitet shpirtin e saj të lirisë. Është nder dhe përgjegjësi që të përfaqësojë shpresat dhe besimin e shkodranëve. Krenar që për kaq pak kohë ndërtuam bashkimin me njerëzit që duan lirinë dhe demokracinë. Më 6 mars kemi mundësi të jashtëzakonshme për të mos rënë në dëshpërim. Shkodra nuk dorëzohet. Fitore.”

Duke kërkuar votat për Bardh Spahinë, lideri historik i PD, Sali Berisha, tha se në 6 mars Shkodra do t’i japë Edi Ramës përgjigjen shkatërrimtare. 

“Kjo fushatë për zgjedhjet vendore në Shkodër dhe 5 bashkitë e tjera, në të vërtetë pas vitit 1991-1992, ka qenë më e veccanta sepse ishte një betejë për pluralizimin e vërtetë politik. Ishte një betejë për shpëtimin e opozitës, ishte një betejë kundër një njeriu i cili faktohet me qëndrimet e tij armik i egër i Shkodrës dhe lirisë së shqiptarëve. Dhe ky njeri është Edi Rama. Edi Rama bëri gjithçka që t’i ndalojë kohën Shkodrës në këto 8 vite. Por përsëri dështoi. Shkodra është një mrekulli e pashoqe për shpirtin e njerëzve të saj, qytetarëve të saj, por një mrekulli e pashoqe e zotit, e natyrës.

Nuk ka një vend tjetër kund, në Ballkan, në Europë, askërkund si Shkodra, një të dytë nuk gjen. Ndaj dhe beteja me Shkodrën është betejë e humbur. Beteja e Edi Ramës i cili ishte sot përsëri këtu sepse ka humbur për shkak të problemeve psiqike që ka, nuk ka koherencë, përndryshe ai nuk do të vinte kurrë më në Shkodër, me ndërprerjen e fondeve që i ka bërë Shkodrës, me mashtrimet e mëdha, me përpjekjen e tij për të rikthyer, rehabilituar ish-xhelatët e diktaturës komuniste. Edi Rama ishte sot këtu por nuk kërkoi asnjëherë ndjesë për firmën e të atit, për varjen e poetit në vitin 1988. Edi Rama bëri gjithçka në këto vite të rikthejë hijet e zeza të diktaturës komuniste.

Por 6 marsi është përgjigjja më shkatërrimtare e Shkodrës për përpjekjet e tij.

Me 6 mars, Shkodra voton për qytetarët e saj, voton për një pranverë shprese të madhe, për Shkodrën dhe mbarë Shqipërinë, voton për të dëshmuar mbështetjen e saj të fuqishme ndaj opozitës së vërtetë dhe pluralizimit në Shqipëri. Voton për të çelë dyert e zgjedhjeve të reja të parakohshme parlamentare, të cilat kanë një rëndësi vendimtare për Shqipërinë dhe shqiptarët,” tha Sali Berisha duke kërkuar nga shkodranët që të votojnë kandidatin e “Shtëpisë së Lirisë” pasi është votë për të ecur të sigurtë drejt fitores përfundimtare të PD-së.

“Në 6 mars, vota e Shkodrës është votë për shpresën, për optimizmin për besimin dhe vendosmërinë, për të ecur të sigurtë drejt fitores përfundimtare të PD-së. Të dashur miq, sot në të njëjtën kohë dhe të njëjtën orë, pengmarrësi kishte marrë edhe pengun me vete, Lulzim bravën apo Lul kimikun siç e quani me të drejtë ju. Ishte e shëmtuar të shihje se si kishin ardhur në ndihmë të njëri tjetrit por mjeranë të sigurtë se Shkodra do u presë faturën, humbjen dhe dështimin e të dyve.

Ndaj dhe thirrja ime për qytetarët e Shkodrës dhe të gjithë demokratët, votoni Bardh Spahinë kandidatin e Shtëpisë së Lirisë, ju garantoj se do jetë një shërbëtor i bindur dhe i përkushtuar i juaji dhe se me buxhetin tuaj, me mbështetje të fuqishme të miqve të Shkodrës në Europë dhe në botë, do të realizojë një sërë projektesh të cila shtrihen nga Thethi, Velipoja, qyteti dhe çdo skaj i këtij rrethi,” tha lideri historik i PD duke veçuar rëndësinë e jashtëzakonshme që ka data e 6 marsit, ku sipas Berishës, duhet marim të gjithë pjesë në votim, të votojmë për pranverën e shpresës, për ti dhënë një shtytje të fuqishme revolucionit demokratik paqësor i cili do të kthejë në Shqipëri pluralizmin, demokracinë dhe integrimin e vendit në BE:

“Dy ditë na ndajnë nga e diela, ti shndërrojmë ne këto dy ditë, në një përpjekje të madhe për takime me çdo mik familjar dhe të njohur ti bëjmë ftesën që të votojnë në bashkitë ku votohet në 6 mars dhe të mos mashtrohen nga hijet e Edvin Ramës dhe Lul bravës, të cilët kalojnë nga një skut në një tjetër, përpiqen të blejnë dhe shkelmojnë vullnete qytetarësh të lirë,” u shpreh lideri historik i PD Sali Berisha para demokratëve shkodranë duke përfunduar:

“Të votojmë ne për shpresën, dinjitetin tonë, të ardhmen më të mirë të Shkodrës dhe Shqipërisë. Dhe njëherë iu uroj fitore, rroftë Shkodra rroftë Shqipëria.”