Me Agrobiznesin në Lushnje, Basha: Do t’i japim fund vjedhjes me hir a me pahir!

Pas takimeve me sipërmarrësit e Agrobiznesit në Lushnje si njërin ndër sektorët më të goditur nga kriza ekonomike e sociale që ka pllakosur Shqipërinë, Kryetari i Partisë Demokratike, Lulzim Basha, konstaton se shkaktar i kësaj gjendje të rënduar nuk është vetëm pandemia, por braktisja e fermerëve nga qeveria këto 7 vjet.

“Sektori i bujqësisë dhe i blegtorisë janë më të goditurit nga kriza ekonomike. Arsyeja nuk është vetëm pandemia, por braktisja e fermerëve nga qeveria këto 7 vjet. Asnjë subvencion për fermerin, duke e bërë më të braktisurin në rajon. Paratë e subvencioneve shkojnë për klientët e qeverisë dhe okigarkët. Vetëm për inceneratorin e Fierit, që akoma nuk ekziston, janë zhdukur 24 milionë euro,” tha Lulzim Basha pas takimit me fermerët, grumbulluesit dhe punëtorët duke shtuar se kjo është një gropë e zezë korrupsioni, ku është përfshirë Edi Rama, Arben Ahmetaj, figura të mrumit të organizuar.

“Në planin me 5 pika të PD me 24 milionë euro që janë zhdukur për inceneratorin e Fierit, mund të ndihmoheshin 24 mijë biznese. Më një çek prej 1 mijë euro për 6 muaj, të ndihmoheshin mijëra fermerë apo mijëra të papunë. Me ne, vjedhja e parave për projekte si inceneratorët, do të marrë fund, me hir a me pahir. SPAK do të detyrohet ta hetojë dhe do të çohet para drejtësisë dhe prapa hekurave, të ndëshkijë këdo që është përfshirë në këtë vjedhje masive,” tha Kryetari i PD, Lulzim Basha.

Ndryshe, sipërmarrësit ndanë me liderin e Opozitës së Bashkuar eksperiencën e hidhur të diskriminimit nga shteti dhe favorizimit me fonde dhe grante të një grushti biznesesh monopoliste të lidhura me pushtetin.

“7 vitet e regjimit të Edi Ramës nuk kanë shënuar asnjë investim substancial në infrastrukturën mbështetëse për bujqësinë. Taksat e larta dhe kostot e papërballueshme të karburantit me cilësi të ulët e kanë bërë të pamundur biznesin për shumicën e fermerëve të kësaj zone. Tokat e Myzeqesë janë lënë djerrë sepse terrori mbi biznesin e ka dekurajuar plotësisht sipërmarrësin,” tha Basha duke shtuar se nuk mungojnë fondet në buxhetin e shtetit, por janë prioritetet korruptive të regjimit të Edi Ramës.

Me këtë rast, Basha i prezantoi fermerëve dhe sipërmarrësve të Lushnjes disa pika kryesore të programit të Partisë Demokratike për bujqësinë:

– 100 milion euro subvencione vjetore direkte për fermerët shqiptarë;

– 50 milion euro investime për modernizimin e infrastrukturës bujqësore;

– heqjen e taksës së qarkullimit 240 lekë për litër që do të ulë çmimin e karburantit;

Në fund, Kryetari i Partisë Demokratike, Lulzim Basha, para fermerëve të Lushnjes u zotua:

“Me programin e Partisë Demokratike për bujqësinë, fermerët do t’i përkasin shtresës së mesme, jo të jenë skllevër të orekseve të pushtetit.”