Me Albin Kurtin, deputetët e Bundestagut: Gjermania mbështet objektivat e Kosovës
Parlamenti gjerman do të ketë vëmendje të shtuar për Kosovën dhe rajonin, theksuan deputetët e Bundestagut, Christian Petry nga Partia Social Demokrate SPD dhe Boris Mijatović nga Partia e Gjelbër në takim me Kryeministrin Albin Kurti ku premtuan mbështetjen e tyre për objektivat e përbashkëta.
Deputeti Petry falënderoi kryeministrin për takimin duke shtuar që është i gëzuar që Kosova është rreshtuar me shtetet që shkojnë drejt Bashkimit Evropian dhe socialdemokrat, tha kishte dëshirë që të urojë edhe personalisht kryeministrin Kurti për qeverinë e re nën udhëheqjen e tij.
Kryeministri Kurti e falënderoi Petry për mbështetjen e tij të vazhdueshme që nga viti 2019, kur u njoftuan gjatë një lojë futbolli në Berlin, e cila u zhvillua mes shoqatës Dardania Bamberg dhe klubit të futbollit të Bundestagut. Ndërsa deputetit Mijatović, kryeministri ia uroi mandatin e parë në parlamentin gjerman.
Deputetët u interesuan për situatën aktuale si dhe marrëdhëniet bilaterale me shtetet fqinje. Kryeministri theksoi se shpreson që Kancelari Scholz e rikthen Procesin e Berlinit në vëmendje të akterëve në Bashkimin Evropian.
Deputeti Mijatović theksoi rëndësinë e faktit që në marrëveshjen e koalicionit të qeverisë gjermane është i theksuar integriteti territorial i Bosnjës dhe se kjo vlenë për tërë rajonin.
Në takim u diskutua mbi situatën me COVID-19 dhe masat e reja mbrojtëse. Kryeministri Kurti i informoi që mbi 60% të popullatës mbi 16 vjeç tashmë janë të vaksinuar, ndërsa po vazhdon vaksinimi edhe me dozën përforcuese.
Kryeministri foli dhe për përkushtimin e Qeverisë së Kosovës për zhvillim ekonomik, reformë të drejtësisë dhe qeverisje të mirë. Ai i informoi se sipas Bankës Qendrore të Kosovës, rritja ekonomike është 9.9 %, e që përbënë rritjen më të madhe ekonomike që nga shpallja e pavarësisë. Buxheti i vitit 2022 është buxheti më i madh ndonjëherë në Republikën e Kosovës, me një rritje prej 12% krahasuar me buxhetin e vitit të kaluar. Bazuar në indikatorët ekonomikë, ekonomia vendore po përformon mirë, me rritjen e të hyrave doganore për mbi 1/3, krahasuar me vitin paraprak. Ndërsa eksportet janë rritur me 66%, të hyrat buxhetore janë rritur për 30%, e investimet e huaja për 53%.
