Me Ambasadorët e QUINT-it, Osmani: Presim çertifikim sa më të shpejtë të rezultateve

Presim çertifikim sa më të shpejtë të rezultateve, në mënyrë që konstituimi i institucioneve të ndodhë sa më parë, tha U.D. Presidentja e Kosovës, Vjosa Osmani, pas takimeve që zhvilloi me Ambasadorët e QUINT-it, SHBA, Gjermani, Mbretëri e Bashkuar, Francë, Itali, si dhe atë të Bashkimit Evropian, ku është vlerësuar lart pjesëmarrja e madhe e qytetarëve të Kosovës në procesin zgjedhor të 14 Shkurtit si dhe vullneti i tyre i qartë për ndryshim.

“Qytetarët e kanë ndërtuar rrugën tonë përpara, nga e cila nuk do të devijojmë në asnjë moment e në asnjë rrethanë. Përgjatë viteve në vijim, prioritetet tona do të jenë zgjidhja e problemeve me të cilat ballafaqohen qytetarët tanë për çdo ditë, duke mbrojtur, në të njëjtën kohë, interesat e vendit tonë edhe jashtë kufijve e duke ndërtuar një imazh për shtetin me të cilin do të ndihen krenarë të gjithë qytetarët tanë por edhe aleatët tanë,” shprehet Presidentja e Kosovës dhe fituesja e zgjedhjeve të 14 Shkurtit së bashku me Lëvizjen Vetëvendosje, Vjosa Osmani, në reagimin e saj përmes rrjetit social Facebook duke përfunduar:

“Presim që çertifikimi i rezultateve të ndodhë sa më shpejtë dhe të respektohen të gjitha procedurat ligjore në këtë proces, në mënyrë që konstituimi i institucioneve të ndodhë sa më parë.”