Me Ambasadorët e Quintit, Kurti: Të dyja shtetet, ose t’i mbajmë ose t’i heqim targat
Pas situatës së krijuar në veri të Kosovës me vendosjen e reciprocitetit me targat dhe kërcënimit të Presidentit Serbisë, Aleksandar Vuçiç, Kryeministri Albin Kurti k azhvilluar një takim me ambasadorët e Quintit u shpreh qartë se targat e përkohshme ose do t’i mbajmë të dyja shtetet ose do t’i heqim.
“Asnjë vendkalim kufitar dje dhe sot nuk ka pasur incidente. Vendimi i djeshëm nuk është provokim e as diskriminim ndaj askujt dhe se Policia e Kosovës ka qenë dhe është profesionale, korrekte dhe efikase. Ligji është zbatuar, trajtimi i barabartë është siguruar,” ka siguruar Kurti ambasadorët e Quintit duke shtuar se njësitë speciale janë aty vetëm për të mbrojtur policinë kufitare dhe vendkalimet kufitare.
“Prania e tyre aktuale është aty për shkak se dhjetëra protestues kanë bllokuar me makineri rrugët që shpiejnë te pikat kufitare 1 dhe 31 e në afërsi të tyre. Policia ka biseduar me protestuesit dhe nuk i ka cenuar ata.”
Ndryshe nga Presidenti i Serbisë i cili refuzoi zgjidhje kompromisi nga Ambasadorët e shteteve më të fuqishme perëndimore, Kryeministri i Kosovës u shpreh:
“Te ky reciprocitet i targave të përkohshme për vetura ose Kosova dhe Serbia kanë të dyja të drejtë, ose e kanë të dyja gabim. Pra, ose do t’i mbajmë aso lloj targash të dyja shtetet, ose le t’i heqim ato edhe Kosova edhe Serbia,” tha Albin Kurti në takim me ambasadorët e Quintit ndërsa i informoi edhe për bisedën telefonike që ka zhvilluar mbrëmë me Zv/Presidentin e Komisionit Evropian dhe Përfaqësuesin e Lartë të BE-së për Politikë të Jashtme dhe Siguri, Josep Borrell.
Ndërkohë Ministri i Punëve të Brendshme, Xhelal Sveçla tha se policët tanë janë në nivel të detyrës dhe po kontribuojnë në ruajtjen e rendit dhe sigurisë, dhe qytetarët serbë nuk kanë pse të ndjehen të frikësuar.
“Masat e ndërmarra nuk janë kundër atyre dhe as kundër ndokujt tjetër. Policia nuk merret me nacionalitetin e udhëtarëve. Ajo i mbron e respekton të gjithë qytetarët pa dallim,” tha Xhelal Sveçla para Ambasadorëve të Quintit ku ishte i pranishëm edhe shefi i Zyrës së Bashkimit Evropian në Kosovë
Në fund, Ambasadorët dhe Kryeministri Albin Kurti u pajtuan që duhet ruajtur paqen dhe qetësinë, stabilitetin dhe sigurinë, dhe se dialogu duhet të vazhdojë e të shmanget përshkallëzimi i situatës.
