Me Ambasadorin e SHBA, Albin Kurti: Shumë shpejt do ta kemi qeverinë e re!
Kryetari i Lëvizjes Vetëvendosje, Albin Kurti, në takim me Ambasadorin e SHBA në Kosovë, Philip Kosnett, është shprehur i bindur për formimin e shpejtë të qeverisë së re dhe thellimin e marrëdhënieve me Shtetet e Bashkuara.
“Ambasadori, z. Kosnett uroi kryetarin Kurti për fitoren në këto zgjedhje duke i dëshiruar sukses të mëtejmë. Ai uroi që nga ky proces sa më parë të kemi një qeveri e parlament funksional. Kryetari Kurti e falënderoi për urimin dhe vizitën, dhe ndau bindjen që shumë shpejt do ta kemi qeverinë e re, dhe mundësinë për të bashkëpunuar për projekte konkrete që ndihmojnë shtetndërtimin demokratik, zhvillimin ekonomik të vendit tonë dhe thellimin e marrëdhënieve bilaterale midis dy shteteve tona,” thekson Lëvizja Vetëvendosje përmes një njoftimi pas takimit që u zhvillua mëngjesin e sotëm.
Ndërkohë Ambasadori Kosnett duke dhënë detaje rreth takimit përmes rrjetit social Twitter shprehet:
“Pata kënaqësinë ta takoj Albin Kurtin për t’ia uruar Lëvizjes Vetëvendosje fitoren dhe për të diskutuar për rrugën e Kosovës përpara,” tha Ambasadori amerikan Philip Kosnett duke përfunduar:
“U bëjmë thirrje palëve të punojnë shpejt për të formuar një qeveri dhe Parlament që u shërben të gjithë qytetarëve dhe që adresojnë të gjitha sfidat urgjente”, ka shkruar Kosnetti në Twitter
Ndryshe, Ambasadori i SHBA në Kosovë, Philip Kosnett, pas përmbylljes së procesit zgjedhor mbrëmjen e 15 Shkurtit përgëzoi Kosovën për organizimin e zgjedhjeve të lira e demokratike duke shtuar se Amerika qëndron krah Kosovës.
