Me Ambasadorin italian, Kurti: Do ta zvogëlojmë pushtetin për ta forcuar shtetin!

Kryetari i Lëvizjes Vetëvendosje, Albin Kurti, në takim me Ambasadorin italian, Piero Cristoforo Sardi, e falënderoi sot për përkrahjen e deritanishme të Italisë ndaj Republikës Kosovës dhe shprehu bindjen se me qeverinë e re bashkëpunimi mes dy vendeve do të ndërtohet e avancohet tutje.

“Kryetari Kurti e njoftoi ambasadorin se prioritet i qeverisë së re do të jetë zvogëlimi i pushtetit për forcim të shtetit, drejtësia institucionale e ligjore dhe zhvillimi ekonomik e punësimi,” thuhet në njoftimin e Lëvizjes Vetëvendosje duke shtuar se Ambasadori u informuar edhe për bisedimet nga Vetëvendosje dhe Lidhja Demokratike, që do t’i japin qeverinë e re Republikës.

Ambasadori Sardi, nga ana e tij, përshëndeti mbarëvajtjen e rregullt të procesit zgjedhor duke vlerësuar pjesëmarrjen aq të madhe të qytetarëve në zgjedhjet demokratike në vend. Ai tha se, pas certifikimit të rezultateve, është e rëndësishme të formohen institucionet dhe qeveria e re.

Në takim, sipas njoftimit, Albin Kurti foli edhe për parregullsitë dhe shkeljet gjatë procesit zgjedhor në komunat me shumicë serbe ku mungojnë sundimi i ligjit, pluralizmi politik e demokracia.