Me Baerbock, Presidentja e Kosovës: Marrëveshja e Ohrit të zbatohet e plotë
Presidentja e Kosovës, Vjosa Osmani në takim me ministren e Jashtme të Gjermanisë, Annalena Baerbock, kërkoi mbështetje për anëtarësim në organizata ndërkombëtare ndërsa kërkoi që marrëveshja bazë dhe aneksi i Ohrit të propozuar nga Bashkimi Evropian dhe mbështetur nga Shtetet e Bashkuara të zbatohen si një e plotë.
“Gjermania është partner strategjik në aspektin politik, të sigurisë dhe atë ekonomik, ndaj Kosova është mirënjohëse për mbështetjen e vazhdueshme të saj. Kërkojmë vazhdimin e mbështetjes gjermane edhe për anëtarësimin e Kosovës në Këshillin e Evropës, NATO, BE dhe organizata të tjera ndërkombëtare,” është shprehur Vjosa Osmani në takim me Annalena Baerbock, bënë të ditur Presidenca e Kosovës përmes një njoftimi për takimin ku Osmani ka folur dhe për integrimin e serbëve në institucionet e Kosovës dhe pengesat që i bën Vuçiç në këtë drejtim.
“Synimi i institucioneve të Kosovës është integrimi i serbëve në shoqëri dhe institucione, porse një gjë e tillë po pengohet nga Serbia dhe presidenti i saj. Në këtë kontekst, në procesin e dialogut me Serbinë, Kosova ka treguar përkushtim për t`i adresuar çështjet që janë në interes të qytetarëve dhe të paqes e stabilitetit rajonal,” tha Presidentja Osmani duke rikujtuar se Kosova e ka pranuar marrëveshjen bazë dhe aneksin e Ohrit të propozuar nga Bashkimi Evropian dhe mbështetur nga SHBA-të, ndaj marrëveshja duhet të zbatohet si e plotë.
Në këtë takim janë rikonfirmuar marrëdhëniet e mira ndërmjet dy shteteve dhe janë diskutuar mundësitë për thellimin e mëtejmë të marrëdhënieve dypalëshe, duke përfshirë angazhimin e përbashkët në përmbushjen e agjendës së gjelbër.
Ndryshe, Presidentja e Kosovës, Vjosa Osmani, e cila po qëndron për vizitë pune në Gjermani, sot ka takuar dhe Kryetarin e Komisionit për Punë të Jashtme në Bundestag, Michael Roth, me të cilin ka diskutuar mbi zhvillimet e fundit politike dhe të sigurisë në Kosovë e më gjerë, Procesin e Berlinit dhe mbështetjen e plotë për marrëveshjet e dala nga ky proces, si dhe procesi i dialogut me Serbinë.
