Me biznesin, Basha: Taksat e shqiptarëve, Rama i çon tek një grusht njerëzish. S’do ti gëzojnë!

Varfëria është ulur këmbëkryq në Vorë, ndërsa bizneset e vogla po falimentojnë nga rënia e fuqisë blerëse dhe taksat e larta, konstaton sot Kryetari i Partisë Deemokratike, Lulzim Basha, pas takimit me biznesin e kësaj zone që vuan ditë për ditë pasojat e krizës ekonomike, problemet e shkaktuara nga tërmeti i nëntorit dhe mbyllja për shkak të COVID-19.

“Fermerët e Vorës si në gjithë Shqipërinë vuajnë pasojat e çmimeve të rritura të naftës, dritave, plehrave kimike e farërave. Kostoja e punës u rritet vazhdimisht, ndërsa shitja e prodhimeve ka rënë edhe për shkak të pamundësisë së qytetarëve për të blerë këto produkte,” tha Lulzim Basha pas takimit në Vorë ku fermerët i deklaruan se kanë pësuar miliona lekë humbje nga mbyllja për shkak të koronavirusit, pasi produktet e tyre kalben për mungesë tregu.

“Ndërkohë që Vora si e gjithë Shqipëria, është zhytur në krizë të thellë, Ramavirusi vazhdon të çojë paratë e taksave të shqiptarëve tek një grusht njerëzish të lidhur me qeveritarët. Vetëm dje, me një firmë, i dhanë 500 mijë euro nga lekët e shqiptarëve klientëve të tyre të inceneratorëve, ndërsa shqiptarët po varfërohen çdo ditë,” tha Kryetari i Partisë Demokratike duke garantuar se këto para nuk do t’i gëzojnë.

“Nga i pari tek i fundit do të përgjigjen para ligjit. Çdo qindarkë e marrë në shkelje të ligjit do t’u kthehet qytetarëve dhe abuzuesit do të shkojnë në burg. Pandëshkueshmëria në këtë vend do të marrë fund.”

Bashkë me shqiptarët që sot janë më të bashkuar se kurrë kundër së keqes, lideri i opozitës tha se do të ndërtojnë një qeverisje normale.

“Në planin tonë ne do parashikojmë uljen e taksave për t’u dhënë mundësi bizneseve të sigurojnë të ardhura të mjaftueshme për të përballuar jetën e tyre e të kenë mundësi të hapin edhe vende pune.”

Paratë që sot shkojnë për aferat korruptive të koncesioneve dhe PPP, Kryetari i Partisë Demokratike, Lulzim Basha, tha se do të shkojnë për të subvencionuar fermerët në bazë të prodhimit të tyre, për të ndërtuar infrastrukturën bujqësore dhe rrugore të fshatrave ndërsa përfundoi:

“Vendi ynë ka resurse të mëdha, njerëz punëtorë e të talentuar. Detyra jonë është t’u japim mundësi të punojnë dhe jetojnë mirë në vendin e tyre.”