Me biznesin e vogël, Basha: Mbijetesa në pikëpyetje, Shqipërisë i duhet…

Nga mëngjesi deri në orët e vona të mbrëmjes në këmbë, në kushte të vështira për bukën e gojës e në fund dalin me humbje: Kjo është e vërteta e përditshme e shitësve dhe sipërmarrësve të vegjël në Njësinë Nr. 4 në Tiranë që konstaton Kryetari i Partisë Demokratike, Lulzim Basha, dhe që ka prekur shumicën e shqiptarëve të cilët nuk arrijnë të sigurojnë as mbijetesën.

“Përditë nga çdo qytetar, pensionist apo i ri, konsumatorë apo tregtarë dëgjoj të njëjtin shqetësim; Rënie e fuqisë blerëse, rritje e faturave dhe e çmimeve, pasiguri dhe pamundësi për të nesërmen,” vlerëson Lulzim Basha duke reaguar përmes rrjetit social Facebook pas takimit me biznesin e vogël ndërsa shton se Ramavirusi godet përditë shumicën e qytetarëve dhe majmet me paratë e taksave.

Xhepat e shqiptarëve po boshatisen përditë, tha lideri i opozitës duke e prekur këtë realitet të trishtë shqiptar sepse paratë e tyre, paratë e taksave të tyre pasurojnë një grusht oligarkësh.

“Pas 7 vitesh ky Kryeministër nuk mund të ofrojë më asgjë sepse gjithçka që ka bërë në këto 7 vjet ka qenë e kundërta e asaj që ka premtuar duke përkeqësuar vit pas viti situatën ekonomike të shqiptarëve.”

Njerëzit kanë nevojë për mbështetje, kanë nevojë për punë, kanë nevojë për liri dhe mundësi, thekson Kryetari i Partisë Demokratike, Lulzim Basha, pas takimit me biznesin e vogël në Tiranë duke përfunduar:

“Shqipërisë i duhet një qeverisje normale, për të zgjidhur krizën që po thellohet çdo ditë dhe për të parë përpara drejt normalitetit dhe zhvillimit.”