Me biznesin e vogël, Berisha: Ju ftoj në rezistencë kundër këtij regjimi!

Duke i garantuar se programin e biznesit, do të jenë ata që ta shkruajnë për qeverinë e Partisë Demokratike, Kryetari i PD, Sali Berisha, në tryezën “Problematika e biznesit të vogël” ku përveç strukturave dhe deputetëve demokratë merrnin pjesë Shoqata e Biznesit të vogël e të mesëm dhe ekspertë, i ftoj të organizohen në rezistencën ndaj këtij regjimi që sot është monist total, dhe një  i tillë, siç tha Berisha, ekziston vetëm në Bjellorusinë e Lukashenkos

“Problemi juaj madhor është problemi i vendit, pra nuk është vetëm problemi juaj por i gjithë shoqërisë shqiptare. Sot ne pas Bjellorusisë së Lukashenkos, ne jemi i vetmi vend në Evropë me regjim krejtësisht monist. Ju garantoj se çfarëdo që të bëhet, çfarëdo që të themi në rast se nuk vendosim ti kundërvihemi me protesta të fuqishme çdo vit e më e rëndë do bëhet gjendja jonë, si shoqëri si biznes, si intelektualë, si qytetarë,” tha Sali Berisha duke shtuar se këtu gjithçka është bërë shtetërore, është bërë qeveritare, e një njeriu, e një partie.

“Ndaj dhe duke ju falënderuar shumë për praninë tuaj këtu ju garantoj se programin e biznesit tuaj do e shkruani ju për qeverinë e PD-së. Por nga ana tjetër ju ftoj, ju ftoj bashkërisht të organizojmë rezistencën ndaj këtij regjimi që sot është monist total, dhe një  i tillë ekziston vetëm në Bjellorusinë e Lukashenkos,” tha Kryetari i PD, Sali Berisha para përfaqësuesve të biznesit të vogël duke përfunduar:

“Nuk duhet të kemi asnjë kompleks. Vërtet ai është i rreshtuar me Putin-in dhe ne jemi vend anëtar i NATO-s. Por pikërisht se jemi vend anëtar i NATO-s nuk duhet të na ndodhin kurrë këto. Dhe qenia vend anëtar i NATO është detyrimi më madhor për ne, për të mbrojtur ato vlera dhe standarde që janë të përbashkëta për vendet e lirisë.”

Fjala e kryetarit të PD Sali Berisha në tryezën e organizuar me biznesin e vogël dhe të mesëm

Së pari kam kënaqësinë të shpreh nderimin dhe respektin tim më të thellë për punën dhe sakrificat që bëni, por njëkohësisht keqardhjen time më të thellë për represionin e vërtetë që ju dhe iniciativa juaj e lirë pëson nga një regjim, nga një qeveri e cila ka tipar kardinal vjedhjen, vjedhjen dhe vetëm vjedhjen. Dhe dua tu them këtu që hajduti nuk ka as profesion, as moral as përgjegjësi zyrtare dhe është vetëm hajdut e mendon se si të plaçkitë tjetrin.

Në çdo veprim po të analizoni këtë qeveri, e gjithë veprimtaria e saj ndaj jush është e tëra se si tu intimidojë, njësoj si hajduti që të futet natën në shtëpi dhe sheh se si ta zbrazë atë,  edhe këta me praktika antiligjorë dhe antikushtetuese, janë vërsulur si lukuni ndaj jush duke bërtitur me propagandën e tyre se “jemi të vetmit në Evropë që nuk tatojmë biznesin e vogël”, me pacipësi absolute se “jemi këta e jemi ata”, paçka se u vënë mbi krye një “Sude” apo “Xhaferr” në krye siç ishte drejtori i tatimeve që ndërtonte piramida me paratë tuaja. Njerëz të cilët, zyrtarë të cilët, pavarësisht se kanë shkollë apo jo, kanë studiuar për financa apo ekonomi, në të gjithë praktikat e tyre mendojnë se si t’ju grabisin ju biznesin e vogël, sepse për ta ju jeni anonim.

Ju jeni njerëz burra dhe gra anonim për ata sepse ata janë një me oligarkët dhe gjithë interesat e tyre bien mbi ju. Nuk jam këtu për tu ndalur në përpjekjet bëra në të shkuarën për një klimë miqësore ndaj biznesit, jam këtu për tu garantuar se programin e qeverisë së ardhshme do ta hartoni ju, dhe jo specialistët tanë. Paketën fiskale të biznesit të vogël do ta hartoni ju, më të favorshmen për ju sepse ky nuk është vetëm interesi juaj por është interesi i vendit.

Jo vetëm në Shqipëri por dhe në vendet më të zhvilluara të botës biznesi i vogël është gjeneratori kryesor i punësimit. Ndaj dhe ne mund të diskutojmë dhe bëjmë propozime, por unë jam sot këtu për tju thënë se programin e PD-së për klimën ndaj biznesit do të jetë i tëri i hartuar nga ju, ju keni eksperiencën, ju keni specialistët, ju keni të gjitha mundësitë ti jepni vendit dhe biznesit shqiptar programin më të mirë. 

Tragjikja është se jemi shumë larg vendeve përreth. Ky që bërtet se “biznesin e vogël jemi i vetmi vend në botë që nuk e tatojmë” paçka se biznesi i vogël tatohet të paktën tre herë më shumë seç tatohej tetë vite më parë dhe që vijnë vazhdimisht në rritje, vijnë çdo vit në rritje taksa, pagesa e të gjitha me radhë, çka tregohet dhe në përgjysmimin e biznesit të vogël në këto vite e shoqëruar direkt me spastrimin etnik të Shqipërisë.

Presidenti juaj e shtroi me shumë të drejtë se ky qëndrim është kompleks. Ky qëndrim armiqësor është politik në radhë të parë, nuk dëgjon nga kjo qeveri një fjalë një shprehje mirënjohje apo miqësore ndaj jush. Rikujtoni tetë vite të fjalimeve koprolalike të pafundme të kreut të qeverisë. Jo. Ka mendësinë e një vjedhësi që për garanci të vetme se nuk vjedh thotë është gjatësia 2 metra i gjatë, paçka se vjedh çdo ditë me firmë nga mëngjesi deri në darkë me ligjet që bën.

Të dashur miq

Problemi juaj madhor është problemi i vendit, pra nuk është vetëm problemi juaj por i gjithë shoqërisë shqiptare. Sot ne pas Bjellorusisë së Lukashenkos, ne jemi i vetmi vend në Evropë me regjim krejtësisht monist. Sot si kurrë ndonjëherë, duke filluar nga portieri i ministrisë tek ministri, nga portieri i çdo institucioni të pavarur tek titullari, nga portieri i gjykatës tek kryetari i gjykatës së lartë, Gjykatës Kushtetuese, institucioneve të drejtësisë, Shërbimit Informativ, Komisioneri i të Dhënave Personale, të gjithë pa përjashtim janë në duart e një partie. Jemi rikthyer pra në monizëm, në një regjim që bazohet kryekëput në uzurpimin total të pushteteve nga një parti. 

Së këtejmi ju garantoj se çfarëdo që të bëhet, çfarëdo që të themi në rast se nuk vendosim ti kundërvihemi me protesta të fuqishme çdo vit e më e rëndë do bëhet gjendja jonë, si shoqëri si biznes, si intelektualë, si qytetarë. 

Nuk dua të shkoj në të shkuarën por një moment do ua them këtu. Në vitin 1991 ato dyqane që ju filluat ti hapni apo ato biznese ishin në hapat e parë. Por instinkti i lirisë ju shtynte ju që herë pas herë të ulnit që të gjithë qepenat. Ajo grevë e juaja e lemeriste regjimin. Ajo kishte një rëndësi të jashtëzakonshme. 

Sot ne paguajmë çmim disa herë më të lartë në botë në proporcion me rrogën për naftën dhe si çmim nominal paguajmë çmimin që paguajnë zviceranët që kanë rroga dhjetë herë më të larta se ne! 

Vetëm kaq?

A do i themi neve ndal kësaj me të gjithë ata që kanë makina?. Po pse meritojmë ne këtë? Pse meritojnë shqiptarët çmimin me të lartë. Para dy ditësh në Maqedoni nafta ishte 185 lekë për litër  në Shqipëri 250 lekë,  në një kohë kur Shqipëria nxjerr 1 milion tonë naftë!

Pse e meritojmë ne këtë? Ne e meritojmë se heshtim, e vetmja arsye është se ne e meritojmë se heshtim. Smund të na bëhet kjo, nuk mund të ndodhë të na bëhet kjo!

 Digjet Sazani, kreu i qeverisë bredh poshtë e përpjetë me avion. Çdo udhëtim i tij shkon 150 mijë euro minimumi, po një kanader nuk e marrim ne verës. E kemi të ndaluar të marrim një kanader me qira ta mbajmë këtu për zjarret. Këtu gjithçka është bërë shtetërore, është bërë qeveritare, e një njeriu, e një partie. Ndaj dhe duke ju falënderuar shumë për praninë tuaj këtu ju garantoj se programin e biznesit tuaj do e shkruani ju për qeverinë e PD-së. Por nga ana tjetër ju ftoj, ju ftoj bashkërisht të organizojmë rezistencën ndaj këtij regjimi që sot është monist total, dhe një  i tillë ekziston vetëm në Bjellorusinë e Lukashenkos. 

Nuk duhet të kemi asnjë kompleks. Vërtet ai është i rreshtuar me Putin-in dhe ne jemi vend anëtar i NATO-s. Por pikërisht se jemi vend anëtar i NATO-s nuk duhet të na ndodhin kurrë këto. Dhe qenia vend anëtar i NATO është detyrimi më madhor për ne, për të mbrojtur ato vlera dhe standarde që janë të përbashkëta për vendet e lirisë.

Ju falënderoj shumë