Me biznesin në Elbasan, Basha: Të bashkohemi, të heqim të keqen me votë!

Elbasani është në krizë të thellë, konstaton Kryetari i Partisë Demokratike Lulzim Basha, pas takimit me biznesin në këtë qytet ku tregtarët pavarësisht nga aktiviteti theksojnë se xhiroja ka rënë në masën 50 për qind,

“Bilancet e vetë tregtarëve tregojnë krizën e thellë ekonomike, krizë që reflektohet në të gjithë bisedat me ta. “Xhiroja ditore ka rënë 50 përqind. Këto 3 vite të fundit, janë padyshim vitet e krizës së madhe të biznesit të vogël,” vlerëson Lulzim Basha pas takimit me tregtarët në Elbasan.

Në një kohë kur kriza është në kulmin e saj për shkak edhe të pandemisë, bashkia e Elbasanit u kërkon një më një taksat që nga qeveria u lajmëruan me bujë si të falura.

“Na tha që nuk keni taksa, e mbas para një jave na e prunë ata të bashkisë letrën të të gjitha taksave,” tha njëri prej tregtarëve.

Pjesa më e madhe e bizneseve pranojnë se tashmë janë në prag falimentimi dhe se në vend që të shesin e të nxjerrin fitime, po bëjnë rojën e bizneseve të tyre pasi askush nuk blen dot më.

“Gjithë ditën rri në këmbë roje. Shumë dobët, shumë dobët, as shpenzimet nuk i nxjerrim dot,” thotë pronari i një biznesi në tregun e Elbasanit.

Në momentin që ju do keni një lekë në xhep, do filloj të xhiroj ekonomia, do ketë konsum, tha Basha, ndryshe:

“Lekët do vazhdojnë të shkojnë te 5 njerëz, kriza që ka fillu do shkoj thellë e më thellë!”

Duhet ndryshuar gjithçka me themel, duhet nxituar konsumi, duhet rritur punësimi, tha Kryetari i Partisë Demokratike, Lulzim Basha, duke garantuar se qeverisja e ardhëshme do të jetë në krah të biznesit dhe jo në shërbim të një grushti oligarkësh.

“Të bashkohemi të gjithë me votë do ta heqim!”