Me biznesin në Kombinat, Basha: Fundi i kësaj qeverie është i afërt!

Në Kombinat situata është si kudo në Shqipëri. Ka një rënie të konsumit si kurrë më parë, bizneset po falimentojnë dhe njerëzit nuk plotësojnë dot as nevojat minimale, konstaton kështu Kryetari i Partisë Demokratike, Lulzim Basha, pas takimit me biznesin në këtë zonë të Tiranës.

“Kryefjala e kësaj situate të rënduar janë listat e personave që nuk kanë mundësi të paguajnë tek dyqanet e bukës dhe ushimeve. Varfëri kudo, biznese dhe qytetarë të lënë në mëshirë të fatit. Ndërkohë Edi Rama bredh në Europë me mijëra euro me charter, para që do të mjaftonin për të mbajtur mijëra biznese dhe familje në nevojë,” tha Lulzim Basha pas kësaj vizite duke shtuar:

“Kjo situatë e tmerrshme ka një përgjegjës, atë që ka vënë interesat e qytetarëve në funksion të xhepave të tij.”

Ky realitet i neveritshëm në të cilin jetojmë, vlerëson Kryetari i Partisë Demokratike, Lulzim Basha, duke reaguar përmes rrjetit social Facebook, duhet të ndryshojë sa më parë ndërsa përfundon:

“Qytetarët e kanë kuptuar se fundi i kësaj qeverie është i afërt. Ata do t’i bashkohen alternativës sonë për një qeverisje që do ta kthejë vendin në
normalitet.”