Me dekorata në xhep/ Pse kaloi në heshtje vizita e Ilir Metës në Berlin…
Presidenti Ilir Meta zhvilloi një vizitë 3 ditore në Berlin, ku mori pjesë në Takimin e 23 Ndërkombëtar të organizuar nga Bundestagu.
Meta ishte i ftuar nderi nga Kryetari i Bundestagut gjerman, me të cilin ka pasur edhe një takim, ndërkohë që mban postin e Presidentit të Republikës.
Dy momentet e çuditshme të kësaj vizite janë: mungesa e një takimi me Presidentin gjerman, si dhe mospasqyrimi i takimeve në Metës nga DW, një prej mediave kryesore në Gjermani.
E ndërsa në faqen zyrtare të Presidencës shqiptare, takimet e Metës janë konsideruar shumë të rëndësishme, duket se ato nuk ka pasur asnjë lloj rëndësie për mediat kryesore gjermane, që e kanë kaluar në heshtje të plotë qëndrimin 3 ditor të Kreut të Shtetit shqiptar në Berlin.
Lidhur me mungesën e një takimi me homologun gjerman, Pafrike.al ka hulumtuar në faqen zyrtare të Presidencës gjermane, nga ku rezulton se Presidenti Frank-Walter Steinmeier nuk ka pasur ndonjë axhendë të ngjeshur takimesh. Në datat që Meta ka qenë në Berlin, Steinmeier ndër aktivitetet më të rëndëisshme ka pasur vizitën në një kamp velash për fëmijët, adoleshentët dhe familjarët.
Kjo do të thotë që, ose nga stafi i Presidetit shqiptar nuk ka pasur asnjë lloj përpjekje për një takim me Steinmeier, ose ky i fundit se ka parë të rëndësishme që në 3 ditët e qëndrimit të Metës në Berlin të ketë një takim formale me të.
Momenti i dytë është ai që vizita e Presidentit shqiptar nuk ka tërhequr vëmendjen e mediave gjermane, në një kohë që në Shqipëri ajo është trajtuar më vëmendje maksimale, si mjaft e rëndësishme.
Madje nëse i referohesh faqes së DW, seksioni shqip, nuk gjen qoftë edhe një njoftim mbi këtë vizitë, takimet apo mesazhet që ka përcjellë Kreu i Shtetit.
Vizita e Metës në Berlin është zhvilluar në datat 15, 16 dhe 17, ditë kur është larguar, ndërkohë që referuar njoftimeve zyrtare nga Presidenca ai ka marrë pjesë në Takimin e 23-të Ndërkombëtar të Berlinit, si i ftuar nderi i Bundestagut gjerman, gjatë të cilit mbajti fjalën e rastit.
Gjithashtu Meta ka pasur një takim me Presidentin e Bundestagut gjerman, Wolfgang Schwuble, ndërsa aktiviteti i fundit i pasqyruar zyrtarisht ishte akordimi i Titullit “Naim Frashëri” për violinisten e shquar shqiptare, Ervis Gega.
Referuar 3 aktiviteteve duket se vizita e Metës në Berlin ka pasur si objektiv kryesor ceremoninë e akordimit të medaljes për violinisten shqiptare, a thua se ajo nuk mund të zhvillohej në Tiranë.
Ndoshta në fund të Presidencës, pasi sot është në fillimet e saj, Meta do të mbahet mend edhe për këtë, si Kryetari i Shtetit që udhëtonte me dekorata në xhep…
