Me demokristianët, Berisha: Rreziku nga politikat nacionaliste të Aleksandar Vuçiçit!
Rreziku që politikat nacionaliste të Aleksandar Vuçiçit, përfaqësojnë për stabilitetin e Kosovës por dhe të rajonit në tërësi, ishte tema e takimit që Kryetari i Partisë Demokratike, Sali Berisha, zhvilloi me përfaqësues të demokristianëve të Kosovës dhe Shqipërisë.
“Avokatia që Edi Rama i bën mos-zbatimit të sanksioneve perëndimore ndaj Rusisë nga ana e Beogradit, elozhet ndaj ish-Jugosllavisë, apo lobimet e tij ndërkombëtare per padronin e tij Vuçiç shihen si një shërbim që dëshmon kapjen e tij dhe që nuk i përkon kurrsesi interesave të kombit shqiptar,” tha Sali Berisha pas takimit ku kishte rikujtuar miqtë nga Kosova se Partia Demokratike e Shqipërisë mbështet planin franko-gjerman si një projekt real për normalizimin marrëdhënieve mes Kosovës e Serbisë, çka duhet të përmbyllet me një njohje reciproke mes dy shteteve ndërsa i siguroi:
“PD mbështes dialogun si rrugën e zgjedhjes të problemeve midis Kosovës dhe Serbisë dhe do të mbetet gjithmonë një mbështetëse pa kushte e interesave kombëtare dhe të pacënueshmërisë së territorit të Kosovës, duke luftuar çdo tentative për copëzim e ndryshim kufinjsh,” tha Kryetari i Partisë Demokratike, Sali Berisha, ndërkohë që përfaqësuesit e PSHDK-së e shihnin ende rrugën e Kombit si një dhuratë tejet të çmuar për Kosovën
Ndryshe, në takim me kryetarin e Partisë Demokratike, Sali Berisha, Partia Shqiptare Demokristiane e Kosovës përfaqësohej nga Zef Morina, Kryetar, Anton Shala Zv/Kryetar dhe Ardian Nikollbibaj. Ndërkohë Partia Demokristiane e Shqipërisë parti aleate e Partisë Demokratike përfaqësohej nga Nard Ndoka, Kryetar, Vladimir Prenga, Sekretar i Përgjithshëm i Senatit Demokristian dhe Franz Gjeluci, Zv/Kryetar.
