Me deputeten britanike Kearns, Osmani: Të ndëshkohet Serbia për sulmin terrorist të 24 shtatorit
Presidentja e Kosovës, Vjosa Osmani, në takim me deputeten dhe kryetaren e Komisionit të Punëve të Jashtme të Parlamentit të Mbretërisë së Bashkuar, Alicia Kearns, duke shprehur falënderim dhe mirënjohje për përkrahjen e jashtëzakonshme për Kosovën dhe popullin e saj si dhe angazhimin e saj të vazhdueshëm për të ngritur vetëdijen për rreziqet dhe sfidat me të cilat ballafaqohet Kosova dhe Ballkani Perëndimor, u përqendrua në zhvillimet politike dhe të sigurisë në Kosovë, pas sulmit terrorist dhe aktit të agresionit të Serbisë ndaj Kosovës, më 24 shtator.
Duke e informuar deputeten britanike me sfidat me të cilat po përballet Kosova, Presidentja Osmani theksoi rëndësinë e përpjekjeve të unifikuara ndërkombëtare për t’iu kundërvënë akteve të tilla terroriste dhe të agresionit në funksion jo vetëm të sigurisë së qytetarëve të Kosovës, por edhe stabilitetit rajonal e më gjerë.
“Në këtë kontekst, hetimet e deritanishme të kryera nga autoritetet vendore, përderisa vazhdojnë hetimet nga partnerët ndërkombëtarë, dëshmojnë se Serbia qëndron pas sulmit të 24 shtatorit në Banjskë të Zveçanit, ndaj kërkoj që të ndërmerren masa ndëshkuese ndaj Serbisë,” tha Presidentja e Kosovës duke e falënderuar deputeten Kearns për përkushtimin dhe mbështetjen e Kosovës në afirmimin e të vërtetës për Kosovën.
“Ndaj ne presim që edhe më tej, angazhimi Juaj të jetë në funksion të prezantimit të gjendjes reale këtu, duke u mbështetur në argumente e fakte, ashtu siç bëni vazhdimisht,” tha Presidentja Vjosa Osmani duke ju drejtuear deputetes Alicia Kearns që është një avokuese e shquar për Kosovën.
Deputetja Alicia Kearns, nga ana e saj, falënderoi Presidenten Vjosa Osmani për ftesën dhe theksoi përkushtimin e saj personal për ta vazhduar mbështetjen ndaj Kosovës, por edhe përkushtimin e Mbretërisë së Bashkuar për të punuar ngushtë në promovimin e paqes, stabilitetit dhe prosperitetit.
Ndryshe, sot deputetja dhe kryetarja e Komisionit të Punëve të Jashtme të Parlamentit të Mbretërisë së Bashkuar, Alicia Kearns, zhvilloi një takim edhe me Kryetarin e Parlamentit të Kosovës, Glauk Konjufca.
