Me Drejtorin e Policisë, Yuri Kim: Policia të rrisë besimin e publikut!
Ambasadorja e SHBA në Tiranë, Yuri Kim, shkoi për ta përgëzuar Drejtorin e Përgjithshëm të Policisë së Shtetit, Gledis Nano, për postin e ri ku, siç tha, i rikonfirmoi bashkëpunimin e fortë mes Shteteve të Bashkuara dhe Shqipërisë për çështjet e ligjzbatimit ndërsa theksoi rëndësinë që ka ruajtja dhe rritja e besimit të publikut tek Policia me integritetin e tyre.
“Pata një takim shumë të mirë në mëngjes me zotin Nano, para së gjithash erdha për ta përgëzuar për pozicionin e ri. Gjithashtu rikonfirmova që bashkëpunimi i fortë mes Shteteve të Bashkuara dhe Shqipërisë për çështjet e ligjzbatimit mbetet i rëndësishëm dhe ne do të vazhdojmë që të ofrojmë sa më shumë mbështetje që të jetë e mundur duke variuar që nga pajisjet, trajnimet dhe çfarëdo lloj tjetër ndihme të jetë e mundur. Gjithashtu diskutuam për rëndësinë që Policia të mund të ruajë dhe të rrisë besimin e publikut me integritetin e tyre. Zoti Nano dhe unë jemi mbështetës të fortë të prezencës së Policisë dhe e dimë që policët, Policia e Shtetit ndërmerr rreziqe të mëdha, ndonjëherë madje duke humbur dhe jetën e tyre, thjesht për të ruajtur ligjin dhe rendin,” tha Ambasadorja amerikane Yuri Kim duke përfunduar:
“Gjithashtu diskutuam rëndësinë se si ligjzbatimi të mund të mbetet i ruajtur nga çfarëdolloj ndikimi apo influence që vjen prej jashtë.”
Pas takimit, Drejtori i Përgjithshëm i Policisë së Shtetit, Gledis Nano, tha se lufta ndaj krimit e korrupsioni nuk mund të bëhet asnjëherë vetëm ndërsa shprehu bindjen se bashkë do ia dalim për të pasur rend dhe siguri më tepër në vendin tonë.
“Sapo zhvilluam një takim me zonjën ambasadore. Takimi u krye në kuadër të bashkëpunimit që Policia e Shtetit ka me të gjitha agjencitë ligjzbatuese të Shteteve të Bashkuara. Siç dihet, Shtetet e Bashkuara janë partneri ynë strategjik dhe kemi mbështetjen kryesore të Policisë së Shtetit për trajnimet, asistencën, logjistikën, konsulencën, kështu që e vlerësoj shumë këtë bashkëpunim dhe këtë mbështetje. I sigurova zonjës ambasadore që Policia e Shtetit do të jetë në nivelet më të larta të performancës, për të luftuar krimin e organizuar dhe korrupsionin dhe patjetër kërkova dhe mbështetjen e vazhdueshme që Shtetet e Bashkuara dhe agjencitë ligjzbatuese mund të japin për Policinë e Shtetit,” tha Drejtori i Përgjithshëm i Policisë së Shtetit, Gledis Nano, duke përfunduar:
“Kjo është luftë që nuk mund të bëhet asnjëherë vetëm dhe duke ditur gjithë mbështetjen që ne kemi pasur deri tani, unë jam shumë i bindur që bashkë do t’ia dalim për të pasur rend dhe siguri me tepër në vendin tonë dhe absolutisht për të mbështetur edhe ne Shtetet e Bashkuara, në mbrojtjen e interesave të qeverisë dhe jetën dhe interesat e qytetarëve amerikanë.”
Ndryshe, ky është takimi i parë zyrtar mes ambasadores së SHBA dhe kryepolicit Nano, i cili mori detyrën më 7 tetor.
