Me dy vite pagë nuk heshtin naftëtarët e Ballshit: Nuk pranojmë lëmosha, s’lejojmë demontimin e rafinerisë!

Dy vite pagë nga qeveria nuk mjaftuan të heshtin protestat e naftëtarëve të Uzinës së Ballshit, të cilët sërish kanë hedhur akuza në drejtim të Qeverisë Rama, duke e bërë të qartë se janë të vendosur që të mos lejojnë demontimin e Uzinës.

Kreu i sindikatës së naftëtarëve, Sokol Dautaj, nga protesta e sotme u shpreh qartë se ardhja e një kontejneri që mendohet se do të bënte edhe demontimin e Uzinës, ka vënë në lëvizje naftëtarët.

“Në buxhetin e ri u miratua mbështetje financiare për naftëtarët. Por se dimë se kur do të hyjë në fuqi vendimi. Kemi qenë për një marrëveshje që rafineria të fillojë punë dhe jo të përfundojë për skrap. Kush e ka ndarë mendjen që kjo rafineri do të shkojë për skrap, e ka gabim. Nëse rafineria është për skrap, s’ka palë të dyta dhe të treta, palë e parë janë natëftarët. S’ka për të hyrë askush këtu, nëse nuk likuidohemi, nuk do të lejojmë, pasi do të kalojnë mbi trupa tanë. Boll u tallën. Nëse duan që palët të zhdukin gjurmët e krimit, ne s’do të lejojmë deri sa të likuidohet dhe naftëtari i fundit. Kjo rafineri do të bëhet skrap nga naftëtarët, dhe nga askush tjetër, nëse do shkojë deri aty,” tha Sokol Dautaj ku shprehën mbështetjen edhe naftëtarët duke shtuar se se nuk do të lejojnë që kjo pasuri të demontohet ndërsa ata presin që të nisë puna.

“Ne nuk e lejojmë që të demontohet kjo pasuri. Ne duam që këtu të vazhdohet punë. Përfiton i gjithë populli shqiptar. Mos të mendojë se do të kalojë lehtë qeveria, duke dhënë lëmosha. Ne nuk kërkojmë lëmoshë, por duke bërë punë. Ai sjell kontejnerët, por ne s’do ta lejojmë. Deri tani s’kemi lënë që të marrim gjë,” tha një naftëtar i cili kishte dhe një mesazh për Kryeministrin Edi Rama:

“Ne i bëjmë thirrje kryeministrit që të marrë vendime të duhura për këtë industri!”