Me Escobarin, Vuçiç: Besoj në përmirësimin e marrëdhënieve SHBA-Serbi!

Presidenti i Serbisë, Aleksandar Vuçiç, tha se ka zhvilluar një bisedë të hapur dhe korrekte me të dërguarin e posaçëm të Departamentit amerikan të Shtetit për Ballkanin Perëndimor, Gabriel Escobar.

Gabriel Escobar sot nisi vizitën e tij në Serbi, ku përveç Vuçiçit, do të takohet edhe me kryeministren serbe, Ana Brnabiç.

“Besoj në përmirësimin e mëtutjeshëm të marrëdhënieve ndërmjet Serbisë dhe SHBA-së,” u shpreh Vuçiç përmes rrjetit social Instagram.

Vizita e zyrtarit të lartë amerikan në Beograd vjen dy ditë para raundit të ri të dialogut mes Kosovës dhe Serbisë, që do të mbahet më 18 mars në Ohër të Maqedonisë së Veriut, ku palët do të bisedojnë për zbatimin e propozimit evropian.

Pas Serbisë, raporton RFE, Escobar pritet ta vizitojë edhe Kosovën.

Ambasadori i Shteteve të Bashkuara në Kosovë, Jeffrey Hovenier, tha sot se plani i Bashkimit Evropian për normalizimin e marrëdhënieve Kosovë-Serbi “është marrëveshja më e mirë në dispozicion” që do të çojë në njohje të ndërsjellë midis dy vendeve.

Kryeministri i Kosovës, Albin Kurti, dhe presidenti serb ende nuk e kanë nënshkruar propozimin, por janë pajtuar se nuk ka nevojë që për këtë dokument të ketë negociata të mëtejme./RFE/