Me fituesit e Primareve në PD, Berisha: Ju jeni misionarë, për të rikthyer bashkitë te qytetari!

Misionarë për të rikthyer bashkitë te qytetari, i quajti Kryetari i Partisë Demokratike, Sali Berisha, fituesit e Primareve për zgjedhjet e 14 majit duke vlerësuar se me këtë garë kanë transformuar, ridimensionuar pluralitetin në PD, por edhe në Shqipëri në tërësi.

“Për këtë sallë, për këtë seli, për PD-në, kjo është një ngjarje shumë e veçantë. Kurrë ndonjëherë më parë, këtu nuk janë ulur kandidatë për qytetarë të parë të bashkive të vendit, një trupë që ka marrë votat nga anëtarësia dhe simpatizantët e PD-së, më shumë se të gjithë institucionet e tjera të kësaj partie në të gjithë ekzistencën e saj.

Kjo është një ngjarje shumë e rëndësishme për ne, është një zhvillim jashtëzakonisht i vyer, i çmuar, në rrugën tonë të konsolidimit të vlerave dhe demokracisë.

Ju keni dalë nga një garë, keni konkurruar me bashkëluftëtarët tuaj, keni dëshmuar në tërësi civilitet, integritet, transparencë dhe me garën që keni bërë, keni transformuar, ridimensionuar pluralitetin në gjirin e PD-së, por edhe në Shqipëri në tërësi,” tha Sali Berisha duel shtuar se nuk ka parti më të hapur në mënyrën më demokratike sesa një parti që përveç anëtarëve të vet, fton të votojnë edhe simpatizantët e saj

“Nuk ka parti më të hapur sesa partitë që bazohen në garën, konkurrencën e lirë dhe të ndershme të zgjedhjes së institucioneve të saj.

Nuk ka parti më të hapur sesa një parti që vendos pluralitetin dhe votën e lirë në themel të zgjedhjes së qeveritarëve të saj vendorë, qendrorë dhe drejtuesve të saj.

Nuk ka parti më të hapur në mënyrën më demokratike sesa një parti që përveç anëtarëve të vet, fton të votojnë edhe simpatizantët e saj. Pranon në garë jo vetëm personalitete të veta, por edhe prurje të shquara nga shoqëria civile, bota akademike. Të gjitha këto kanë ndodhur në këtë garë.,” tha kryedemokrati para fitueseve të Primareve duke e pranuar se nuk ishte një garë e përsosur.

“Por këto ishin risi të pamohueshme të saj. Secili prej jush ka kontributin, investimin në këtë realitet të ri të krijuar në PD, por edhe në Shqipëri.

Secili kandidat, që doli i dytë apo i tretë në garë, ka meritën e madhe se firmosi pluralitetin brenda në PD.
Por një aspekt tjetër jashtëzakonisht i rëndësishëm, thelbësor i garës, qëndron në përmbysjen përfundimtare të përfaqësimit. Nga përfaqësim i kryetarit dhe kryesisë, te përfaqësim i anëtarit dhe simpatizantëve të PD,” tha Berisha i bindur se anëtarësia e PS nuk ka më asnjë zë te qeveritarët e saj

“Ky është modeli më demokratik për një forcë politike dhe për një vend. Ky model nuk zbatohet në shumë forca politike, por ata që e kanë zbatuar, kanë vendosur standardet më të larta të demokracisë dhe përfaqësimit në partitë e tyre.

Ndaj dhe ne jemi shumë krenarë me ju, me të gjithë ata që morën pjesë në garë, me të gjithë drejtuesit, anëtarët dhe simpatizantët që kompletuan këtë proces. Ne dëshmuam para shqiptarëve përkushtimin e plotë për dinjitetin e tyre, për votën e tyre, për vullnetin e lirë,” tha Kryetari i Partisë Demokratike:

“Nëse hidhet sytë në krahun tjetër, që mediat po e quajnë rëndom shpella, aty gëlon ryshfeti, gëlon peng marrja, aty përcaktojnë droga, krimi dhe bandat. Anëtarësia e PS nuk ka asnjë thënie, asnjë zë te qeveritarët e saj. Ata nuk përfaqësojnë më anëtarësinë, ata përfaqësojnë vetëm sektin e rilindjes, që është një sekt fund e krye antishqiptar. Një sekt, një përzierje e klaneve të drogës, klaneve të krimit, e aferave të mëdha korruptive kombëtare dhe ndërkombëtare

E vërteta është se sot çdo shqiptar i pa parti, por edhe çdo socialist i ndershëm, si ai që thotë se nuk u besova veshëve që është hequr vota për zgjedhjet e kryetarëve të degëve. Çdo socialist që e konsideron dinjitetin, dinjitet, përfaqësimin, përfaqësim është shumë herë më afër jush. Shumë herë më afër secilit prej jush, sesa me kandidatët e socialistëve.”” tha Kryetari i Partisë Partisë Demokratike, Sali Berisha, duke përfunduar:

“Ju kaluat një garë, një betejë për të hyrë në luftë. Një luftë elektorale. Në një betejë elektorale, me qëllimin më madhor, për t’ia rikthyer bashkitë qytetarëve shqiptarë. Ne ua rikthyem anëtarëve dhe simpatizantëve të PD-së, përfaqësuesit e tyre dhe ja ku jeni.

Ju jeni misionarë. Për të rikthyer bashkitë te qytetari.

Ju filloni garën si misionarë, që bashkitë të shndërrohen siç duhet të jenë, në shtëpitë e vërteta të qytetarëve.

Ju nisni një betejë me misionin e madh, jo vetëm për largimin e barrës së rëndë që sekti i rilindjes ka hedhur mbi shpatullat e qytetarëve shqiptarë.”