Me formularë para mediave, Paloka: Kontrolloni, të gjithë ata që kanë firmosur janë delegatë të Kuvendit!

Pas shumë insinuatave dhe akuzave të Sekretarit të Përgjithshëm Gazmend Bardhi dhe mediave të Edi Ramës aktualisht në shërbim të Kryetarit të Partis Demokratike, Lulzim Basha, sot Kryetari i Këshillit Kombëtar të PD, Edi Paloka ka publikuar para mediave të interesuara 4.200 formularët e dorëzuar në mbështetje të iniciativës së liderit historik Sali Berisha për thirrjen e Kuvendit të jashtëzakonshëm Kombëtar.

“Qëllimi sot, i gazetarëve është kush ka durim të ulet dhe t’i shohë këta formularë. Të dhënat personale, ato që duhet të ruhet fshehtësia ju lutem të mos i fokusoni.

Janë 4.200 të dorëzuar atë ditë, kanë ardhur dhe formularë të tjerë, por rrimë tek 4200. Janë formularë të plotësuar nga delegatët. Delegatët e Kuvendit janë të përcaktuar në statut, janë pjesëtarë të kryesisë së degëve, anëtarë të Këshillit Kombëtar, deputetë dhe deri tek kryetari i partisë. Të gjithë këta që kanë firmosur nuk janë thjesht anëtarë, por janë delegatë të Kuvendit. Delegatët nuk ndryshojnë, janë po ata. Nga kryetar seksioni deri tek kryetari i partisë të degës. Janë të gjitha të dhënat, emër, mbiemër, emër të babës, numrat e kartës së identitetit dhe funksionin në parti që i bën delegat. As unë dhe as ju nuk do bëni verifikimin e emrave. Këtë gjë e bën Komisioni i verifikimit të mandateve në Kuvend,” tha Edi Paloka duke sqaruar dhe procedurat në vijim:

“Unë jam Kryetar i Këshillit, njëra palë më ka kërkuar të depozitoj këta formularë. Ky është Kuvend i jashtëzakonshëm. procedurat e statuti parashikojnë kur Kuvendi mblidhet në mënyrë normale. në këtë rast kur nuk iu përgjigjen detyrimeve statutore, jemi të detyruar t’i bindemi vullnetit të shumicës së Kuvendit të PD-së. Jemi të detyruar të zbatojmë detyrat tona statutore. Nëse dikush nuk e zbaton këtë detyrim, atëherë kanë detyrimin firmëtarët, që janë realisht nismëtarët e Kuvendit të vazhdojnë me procedurat.”

PD për momentin ndodhet në një krizë dhe shumica, kërkon që kjo gjendje të zgjidhet, tha Kryetari i Këshillit Kombëtar, Edi Paloka duke i bërë thirrje cilido që të verifikojë numrin e formularëve ndërsa verifikimet, sipas tij, do të bëhen më 11 dhjetor nga një Komision i mandateve që do të formohet nga Kuvendi.

“Kur 4.200 pa futur të tjerët që do të sjellin formularë, kërkojnë të zgjidhin një krizë nëpërmjet kuvendit, kjo futja a duhet lajmëruar data, këto janë gjëra që PD nuk i vlejnë. Ka gjëra më të rëndësishme që duhet të zgjidhi PD, e nuk zgjidhet kriza duke u marrë me procedurat. Kemi një realitet, që jemi në krizë. Shumica e delegatëve kërkojnë zgjidhjen nëpërmjet Kuvendit dhe kështu e ndihmojmë PD. Sot ke mundësi të shohësh a janë 4.200 formularë. A janë të vërteta, falso, këtë se bëjmë dot as unë as ti e me statut se bën dot asnjë tjetër. Duhet të gjendesh para një fenomeni. Kuvendet e tjera të jashtëzakonshme do të bëhen me rregulla më të qarta. Këto vërtetohen nga komisioni për verifikimin e mandateve. Ditën e Kuvendit një përfaqësi, sepse ne jemi ndarë me palë, ndërsa unë në mes për momentin.”

Ndryshe, dorëzimin e 4.200 formularëve të firmosur në mbështetje të iniciativës së liderit historik Sali Berisha për thirrjen e Kuvendit të jashtëzakonshëm Kombëtar pranë Kryetarit të Këshillit Kombëtar, Edi Paloka, Kryetari i PD, Lulzim Basha dhe Sekretari i Përgjithshëm, Gazment Bardhi e cilësuan si blof të Barishës pasi nuk arriti të mbledhë 1/4 e firmave që parashikon Statuti i PD.