Me kandidatët për deputetë, Basha: Do luftojmë në terren dhe parlament deri në fitore!

Nuk është koha për protesta, duhet vetëdijësuar qytetarët për masakrën elektorale që protestat të kenë kuptim, tha Kryetari i Partisë Demokratike në takim me kandidatët për deputetë të PD në zgjedhjet e 25 Prilliti ku dhe e bëri të qartë se do të luftojnë me të gjitha fuqitë duke përfshirë dhe parlamentin deri në fitore.

“Dua të falenderoj secilin nga ju. Ju keni punuar shumë fort me besimin e palëkundur në rrugën tonë, në demokracinë tonë, në vendin tonë. Pavarësisht vjedhjes më të madhe të votave në historinë e Shqipërisë të kryer nga Rama-Doshi, ne sollëm një arritje të madhe për partinë tonë dhe për vendin tonë. Ne, pa hequr dorë nga vlerat tona, u bëmë më të fortë kudo. Tani do të luftojmë me të gjitha fuqinë tonë derisa në fitore. Fushata jonë nuk ka mbaruar, ajo vazhdon me energji maksimale,” tha Lulzim Basha duke përfunduar:

“Unë do takoj njerëzit në terren, për t’i falënderuar, për të biseduar me ta, për t’i dëgjuar, duke ju kërkoj që edhe ju të bëni të njëjtën gjë në ditët në vijim. Së bashku do të fitojmë!”

Ky qëndrim u shoqërua me ndërhyrjen e disa prej kandidatëve për deputetë që fituan mandatin, ku Xhelal Mziu deputet i Qarkut Dibër kërkoi që Lulzim Basha të mos organizoi zgjedhje të brendshme për Kryetarin e PD por të merret me dokumentimin e krimit elektoral, deputeti i Lezhës kërkoi organizim të protestave ndërsa Agron Gjekmarkaj kërkoi qartësi nëse PD do të futet në parlament në muajin shtator.

Kryetari i Partisë Demokratike Lulzim Basha ishte i prerë se nuk është koha për protesta dhe se prioritet është vetëdijësimi i njerëzve për atë që ka ndodhur me zgjedhjet e 25 prillit.

“Gjëja më e thjeshtë për mua është të thërras protesta. Por po pas kësaj? Jo, sepse nuk është kjo koha. Prioriteti ynë është të vetëdijësojmë njerëzit për masakrën elektorale që edhe protesta të ketë kuptim,” citohet të ketë thënë Kryetari i PD, Lulzim Basha, ashtu si dhe konfirmimin se opozita do të jetë në parlament.

“Do konsumojmë çdo hapësirë, edhe parlamentin dhe do mbrohemi fuqishëm!”

Nuk dihen arsyet por në këtë takim kanë munguar lideri historik Sali Berisha dhe Aleatët pjesë e listës së PD-së në zgjedhjet e 25 Prillit.

Ndryshe, duke konfimruar se Partia Demokratike po vazhdon mbledhjen dhe faktimin e manipulimit të masakrës zgjedhore të 25 prillit, Kryetari i PD, Lulzim Basha, sot ka akuzuar si autor të kësaj masakre treshen Rama-Doshi-Rakipi ndërsa shtoi se atë që ka premtuar opozita do ta bëjë realitet me gjithë shqiptarët, anëtarësimin e Shqipërisë në Bashkimin Europian. Betejë, kjo, tha Basha, e cila do të bëhet në të gjitha frontet, mënyrat dhe mundësitë që ekzistojnë dhe përfundimi i saj do të jetë i qartë, rrëzimi i regjimit Rama-Doshi-Rakipi dhe kthimi i Shqipërisë, shqiptarëve!