Me kandidatin e Bashkisë Tiranë, Berisha në FRPD: Ju ndërmorët procesin e rithemelimit të PD-së!

Forumi rinor me drejtuesit e saj ishin ata të cilët ndërmorën procesin e rithemelimit të Partisë Demokratike, tha Kryetari i PD-së, Sali Berisha, para FRPD, ku së bashku me kandidatin e koalicionit “Bashkë Fitojmë” për Kryetarin e Bashkisë Tiranë, Belind Këlliçi, zhvilloi takim me të rinjët e këtij Forumi.

Ndërkohë Kryetari i Partisë Demokratike rikujtoi se të rinjtë ishin dhe promotorët e fitores së PD-së në vitet ‘90.

“Të rinjtë ishin ata që bënë revolucionin demokratik të dhjetorit ‘90 dhe themeluan PD-në.

Të rinjtë ishin pa asnjë mëdyshje ata të cilët çuan mesazhin, dritën e lirisë dhe u përballën me monizmin më stalinist të Europës në atë kohë dhe u bënë promotorët e fitores së PD-së.

Shqipëria ishte vendi më i izoluar i Europës dhe ndër më të izoluarit e planetit.

Shqipëria kishte nevojë për mendje të hapura dhe mendjet e hapura ishin mendjet e të rinjve. Në këtë kontekst, ata luajtën një rol kryesor në të gjitha reformat dhe transformimet e vendit.

Sot, pas 30 vitesh, Shqipëria ka rënë në një monizëm të dytë, i cili në dallim nga monizmi i viteve ’90, që bazohej në doktrinën çnjerëzore marksiste, monizmi i sotëm bazohet në krimin, drogën dhe vjedhjen.
Edi Rama sot kontrollon 10 përqind më shumë pushtete se diktatori i fundit komunist në vitin 1991.

Në këtë kontekst, kjo mbështetje e juaj merr një rëndësi edhe më të veçantë. PD dhe forumi i saj, u themeluan dhe mbetën gjithnjë forca më perëndimore e vendit, lokomotiva të vërteta të integrimit të Shqipërisë në NATO dhe BE.

Në Shqipëri është vendosur monizmi i plotë, Edi Rama kontrollon në mënyrë të hekurt të gjitha pushtetet.
Për gabime të rënda edhe të PD, e cila bojkotoi zgjedhjet lokale, sot në të gjithë Shqipërinë, PD ka vetëm një pushtetar vendor, kryebashkiakun e Shkodrës,” tha Sali Berisha duek folur për situatën kritike në të cilën ndodhet Shqipëria.

“Ronald Regan e thotë me të drejtë se demokracisë i mjafton një gjeneratë për t’u zhdukur.

Në njëfarë mënyre kjo po ndodhte në Shqipëri.

Edi Rama, që shëtit nëpër botë duke e ekspozuar zhgarravina, të cilat dy kritikë i cilësuan zhgarravina të një aduti të droguar, arriti të korruptojë kryezbuluesin e SHBA, të FBI, ta kontraktojë atë si vrasës me pagesë ndaj PD-së dhe opozitës shqiptare.

Ky skandal ka marrë përmasa botërore, por në ato kushte, kur vërtet po bëheshin përpjekje për të asgjësuar PD-në si forcë të të vërtetë politike opozitare, ishin të rinjtë, forumi rinor, i pari që mbështeti nismën me të cilën unë kundërshtova vendosmërisht atë përpjekje shkatërrimtare për opozitën shqiptare.
Ishte forumi rinor, drejtuesit e saj, ata të cilët kaluan me vendosmëri në mbështetje dhe ndërmorën procesin e rithemelimit të PD-së.

McGonigal nuk ishte një bajloz i zi solitar. Edi Rama kishte korruptuar edhe të tjera.”

Me këtë rast lideri i opozitës foli për sistemin e primareve dhe kandidimin e sotëm me 61 kandidatë, me në krye Belind Këlliçin, kandidatin për Kryetar të Bashkisë Tiranë.

“Ata nuk janë më kandidatët e kryetarit dhe kryesisë, por janë kandidatët e votës së lirë dhe kjo ka shndërruar një ndryshim shumë të madh në qëndrimin tonë dhe qëndrimin e shoqërisë shqiptare ndaj nesh.

Ju falënderoj që keni ardhur të mbështesni Belind Këlliçin.

Tirana ka nevojë jetike për ndryshim. Unë do u jap vetëm 2-3 tregues të institucioneve prestigjioze ndërkombëtare.

Sot Tirana është në 10 qytetet më të ndotura të planetit. Sot Tirana është ndër 10 vendet me shërbimin shëndetësor më të shkatërruar në planet.

Tirana i ka sot këto sepse ka një falls-kryebashkiak. Nëse do bënit, vizatonit, përshkruanit kryebashkiakun aktual që do dorëzojë së shpejti detyrën, ai është prototipi i një personazhi fake. Por ai është edhe një vjedhës dhe hajdut i pamëshirë i qytetarëve të Tiranës,” tha Kryetari i Partisë Demokratike duke falënderuar me këtë rast Belind Këlliçin për premtimin që bëri për transportin falas për të gjithë qytetarët në Tiranë.

“Unë e falënderoj Këlliçin për premtimin që bëri para jush.

Transporti falas ishte, mendoj unë, premtimi më i guximshëm, më i domosdoshëm, premtimi që do ndikojë në buxhetin e të gjitha familjeve.

Por nuk do ndikojë vetëm në buxhetin, por edhe në shëndetin të gjitha familjeve.

E thamë që Tirana është ndër 10 qytetet më të ndotura në botë, sepse këtu trafiku është organizuar me principin se si të udhëtohet më ngadalë, se si njerëzit të thithin sa më shumë gazra toksike.

Do pakësohet numri i atyre që përdorin mjetet personale për të shkuar në punë, sepse do përdorin mjetet publike,” tha Kryetari i Partisë Demokratike, Sali Berisha, duke përfunduar:

“Tirana nuk është më e varfra, nuk është ndër dhjetë vendet e fundit në botë, por është më e vjedhura.
Unë dua ta përgëzoj zotin Këlliçi për këtë premtim solemn me një impakt shumë të madh për jetën e Tiranës.

Unë kam besim se me programin e tij do të sjellë një revolucion të vërtetë dhe se qyteti do vendoset në shinat e një qyteti normal dhe me perspektivë.”