Me kë tallet Ilir Meta?!
Presidenti Ilir Meta nuk dekretoi Genti Cakajn si ministër të Jashtëm sepse është i papërvojë dhe cënohen kufijt e Kosovës, madje edhe i papërgjegjshëm që nuk është pajisur me çertifikatën e sigurisë; Dhe, dekretoi të përgjegjshmin Edi Rama, të cilin nuk e zë gjumi, duke menduar për kufijt e Kosovës.
“Emërimi i Kryeministrit edhe në detyrën e Ministrit është një rast i veçantë, që nuk parashikohet dhe as ndalohet nga Kushtetuta e Republikës së Shqipërisë”,
thekson Ilir Meta në Dekretin me të cilin Presidenti Meta tashmë i ka të mbrojtur kufijt e Kosovës, ndërsa jep edhe një arsye pak më banale se kjo:
“Në shqyrtimin e këtij propozimi Presidenti i Republikës, në cilësinë e Kreut të Shtetit, ka mbajtur në konsideratë edhe rëndësinë e evitimit të çdo mundësie për krijimin e një krize institucionale, e cila do të dëmtonte pozitën e Republikës së Shqipërisë në marrëdhëniet ndërkombëtare.”
Me kë mendon se po tallet kështu Ilir Meta ndërsa po dëmton shtetin e Shqipërisë dhe atë Kosovës në momentin më të rëndësishëm historik.
Tallje për tërë
Kur Ilir Meta refuzoiGent Cakajn ministër për Europën dhe Punët e Jashtme të Shqipërisë, u çua i madh e i vogël, analist e banalist, për të na thënë se sa burrë shteti është Ilir Meta. Kryeministri Edi Rama u mërzit paksa për syrin e kamerës duke konfirmuar këtë goditje të Ilir Metës në emër të mbrojtjes së Kosovës.
Ata që e njohin mirë Ilir Metën heshtën, për të mos thënë se me kë tallet Meta. Ata që paguhen nga Likja, hapën gojën, jo për të folur për një Dekret banal që nuk duhet ta shkruaj edhe një jurist me diplomë falso, jo për të thënë se ç’është ky dekret i arsyetuar me referencë, televizionin e Baton Haxhiut, por për ti dhënë Likes liçencën e rojes kufitare të Kosovës!
E meqë nuk është risi, kur socialistët e lakojnë emrin Kosovë, gjithmonë e kanë për keq, kështu ndodhi edhe me socialistin e radhëve të para, Ilir Meta. Duke refuzuar Gent Cakajn që askush nuk e njihte dhe të gjithë mbështetësit e Likes e shanin, Presidenti Ilir Meta lëshon Dekretin duke iu referuar televizionit të Baton Haxhiut me deklaratat e Gentit, për ta cilësuar Cakajn me mungesë përvoje.
“Qëndrimet e tij publike në kontekstin e debatit për të ashtuquajturin korrigjim të kufijve të Kosovës e Serbisë, por edhe të Ballkanit Perëndimor janë në kundërshtim të plotë me programin e qeverisë aktuale për politikën e jashtme dhe shtjellimin e saj nga Ministria e Punëve të Jashtme!”
Po çfarë tha ky ditëziu te Batoni, që u bë çështje kombëtare nga Toplica në Prevezë ndërsa përfundoi në gojën e Presidentit:
“Tani te korrigjimi i kufijve semantikisht kjo nuk është thjeshtë një operacion linguistik për ta relativizuar çështjen e këmbimit territorial, por situata ka evoluar tutje. Evoluimi i parë është, sepse po konceptohet në suaza të korrigjimeve të përgjithshme territoriale që janë duke ndodhur në Ballkanin Perëndimor”.
A thua ta ketë kuptuar këtë fjali të Gen Cakajt, Presidenti Ilir Meta, që e vlerësoi të rrezikshme dhe e bindi të hedhë firmën për ta refuzuar Cakajn si ministër për Europën dhe Punët e Jashtme të Shqipërisë.
Ndoshta për momentin, çdo njeri me mendje të shëndoshë dhe pa e njohur Ilir Metën, nuk do të paragjykonte, madje edhe kur u tensionua situata dhe u krijua një krizë institucionale ndërsa Gent Cakaj u gozhdua në mediat e Likes, por lëvizja e radhës së kryeministrit Edi Rama do ta gozhdojë Liken në portën e Presidencës. Për rrjedhojë do të lëshohet një Dekret i turpshëm, që e konfirmon Ramën ministër për Europën dhe Punët e Jashtme të Shqipërisë.
Tashmë që Edi Rama është vetëm ministër i Gent Cakajt sepse i Shqipërisë “de facto” është vetëm Gent Cakaj, nuk është e qartë me kë tallet Ilir Meta.
Kur Presidenti në dekretin e tij thotë se “emërimi i Kryeministrit edhe në detyrën e Ministrit është një rast i veçantë, që nuk parashikohet dhe as ndalohet nga Kushtetuta e Republikës së Shqipërisë,” a mendon ai se sot dikush është i bindur se tashmë kufijtë e Kosovës janë të sigurt me Edi Ramën ashtu si edhe përfaqësimin ndërkombëtar të Shqipërisë, për të cilin e ka shprehur shqetësimin. Ose edhe faktin që ka ndikuar në dekretimin e Edi Ramës:
“Në shqyrtimin e këtij propozimi Presidenti i Republikës, në cilësinë e Kreut të Shtetit, ka mbajtur në konsideratë edhe rëndësinë e evitimit të çdo mundësie për krijimin e një krize institucionale, e cila do të dëmtonte pozitën e Republikës së Shqipërisë në marrëdhëniet ndërkombëtare.”
Njeriu që krijoi krizën institucionale duke mos dekretuar Gent Cakajn, në emër të evitimit të kësaj krize dekreton Edi Ramën. E kur jemi te ky i fundit, dhe duke ju referuar televizionit të Baton Haxhiut, meqë na duhet për të hartuar Dekeretet e Likes, ti sjellim në vëmendje Presidentit dhe jo vetëm, se çfarë thotë Edi Rama në televizionin e Batonit i cili po transmetonte Opinionin e TV Klan, në fundshtatorin e vitit 2018.
Pa bërë shkencë si fakiri Cakja, Edi Rama thotë se ndryshimi i mundshëm i kufijve mes Kosovës dhe Serbisë është instrument dhe jo qëllim, ndërkaq pë arritjen e marrëveshjes potenciale mes Kosovës dhe Serbisë tha të jetë moment historik që shqiptarët mund ta humbasin në rast të sjelljeve amatoreske.
“Unë jam shumë i qartë që ne jemi përpara një shansi historik dhe kemi shumë më tepër gjasë ta humbasim se sa ta fitojmë nëse vazhdojmë të sillemi si amatorë,” tha Edi Rama kur të gjithë në Kosovë e Shqipëri, me përjashtim të atij dhe Hashim Thaçit, ishin kundër ndryshimit të kufijve.
“Ndryshimi i kufijve nuk është qëllim, është instrument. Dhe nuk mund të thuash dot a je për të përdorur thikën nëse nuk më thua për çfarë qëllimi? Për të shëruar apo për të vrarë? Sepse thika edhe vret, edhe shëron. Sepse këtu është pika ku vendimmarrësit shqiptarë duhet të mblidhen dhe ku presidenti i Kosovës duhet të hapë rrethin e tij përtej rrethit të inateve dhe të klubit të Selanikut të shqiptarëve. Me diasporën, me njerëz që vijnë nga bota e dijes historike”. http://klankosova.tv/rama-ndryshime-i-kufijve-eshte-instrument-e-jo-qellim-1/
Sidoqoftë Presidenti Ilir Meta e dekretoi Edi Ramën, pa dëgjuar as Baton Haxhiun e aq më pak Sandrin dhe Fevziun, por pa thënë edhe se me kë po tallet.
Nuk dihet se sa do të ishin të sigurt kufijtë e Kosovës me Gent Cakajn ministër, sepse nuk varet nga ai, por për të kuptuar se do të jenë me Edi Ramën, Likes i mjafton të dëgjojë të paktën Sonja Biserkon, që nuk është as me opozitën serbe, as me Aleksandar Vuçiçin, dhe shumë më pak me Baton Haxhiun, kur dihet se ishte kundër regjimit të Batonit, përkatësisht Millosheviçit.
Kryetarja e Komitetit të Helsinkit në Serbi, Sonja Biserko, në fillim të tetorit të vitit të kaluar, për revistën “Vreme” nuk foli as për “korrigjimi i kufijve semantikisht” siç tha Gent Cakaj, as se “ndryshimi i kufijve nuk është qëllim, është instrument” siç tha Edi Rama, as për “korrigjim të kufijve të Kosovës e Serbisë, që janë në kundërshtim të plotë me programin e qeverisë aktuale për politikën e jashtme dhe shtjellimin e saj nga Ministria e Punëve të Jashtme,” siç tha Ilir Meta, por e bëri të qartë se për për ndarjen e Kosovës, Aleksandar Vuçiç dhe Edi Rama ka dy vjet që bisedojnë:
“Nëse iniciativa për ndarje shpërtheu në sipërfaqe për njëherë, ajo ‘zihej’ të paktën prej dy vitesh. Beogradi, në fakt gjatë gjithë kohës kërkonte partner në Tiranë dhe më në fund e gjeti kryeministrin Edi Rama. Këto negociata kanë filluar para dy viteve kur Rama ishte në Nish, por u zbuluan nga Washingtoni dhe Londra. Mirëpo, më vonë për idenë e ndarjes ose korrigjimit, sido që të quhet, i janë bashkuar edhe një numër i konsiderueshëm i personaliteteve të njohura nga Perëndimi siç janë Wolfgang Petritsch, i cili punon për Zyrën ligjore e cila punon për Qeverinë e Serbisë, më pas Tony Blair, Ish-Ambasadori amerikan në Beograd, Cameron Munter, Aleksa Soros, por…” https://www.vreme.com/cms/view.php?id=1629844&fbclid=IwAR2kcjWMCOojDm-91zS1x1H7n6JUAqnsQuQS4iYRcoVRSJ2y5L88F-Yh4rA
Duke pasur parasysh afërsinë që Ilir Meta ka dhe e kishte me Beogradin, në veçanti kryeministrin e Serbisë, Zoran Gjingjiç, i cili kufirin e ndarjes së Kosovës e çonte deri në Prishtinë, duke pasur parasysh këtë që thotë Sonja Biserko për negociatat Rama-Vuçiç, loja e Presidentit me dekretet dëshmon qartë se:
-Presidenti Ilir Meta tallet me Kushtetutën kur i referohet atyre që thuhen në një intervistë televizive, duke injoruar deklaratat tjera nga i njëjti kabinet qeveritar në po të njëjtin televizion, për të njejtën çështje, siç është rasti me Gent Cakajn dhe Edi Ramën;
-Presidenti tallet me Qeverinë e Shqipërisë, ministrat dhe kryeministrin, edhe pse e ka të qartë si kryeministër që ishte, se kufiri i Kosovës nuk është varur, dhe fal zotit as sot nuk varet nga ministri i Jashtëm i Shqipërisë, e aq më pak ai i Kosovës.
-Presidenti Ilir Meta tallet me kombin, sot, kur loja me dekrete përfundoi. Ai propagandon se u tejkalua kriza në Shqipëri, kur shqiptarët janë në rrezik më të madh se kurrë më parë. Sot atyre u rrezikohen edhe kufijtë e Shqipërisë, sepse nuk kanë vetëm kryeministër – Edi Ramën dhe president – Ilir Metën, por kanë edhe Edi Ramën – ministër të Gent Cakajt!
