Me Konfidustrinë, Basha: Platforma jonë, siguri juridike me politika të qëndrueshme fiskale

Mungesa e konkurrencës së lirë, korrupsioni endemik, burokracitë, taksat e larta dhe shpenzimet buxhetore për kontrata dhe projekte inefiçente, mbeten shqetësimet kryesore të industrialistëve shqiptarë thekson Kryetari i Partisë Demokratike, Lulzim Basha, pas takimit me Përfaqësuesit e Konfederatës së Industrive të Shqipërisë, Konfindustrisë.

“Konkurrenca e pandershme, përfshirja në ekonominë shqiptare të parave me origjinë të dyshimtë, mungesa e politikave mbrojtëse të prodhimit vendas, aksesi i ulët në kreditimin e ekonomisë, mungesa e sigurisë juridike në respektimin e kontratave dhe ndryshimet e shpeshta të politikave fiskale ishin kryefjala gjatë bashkëbisedimit tonë,” tha Lulzim Basha pas takimit me Administratorin e Përgjithshëm të Konfindustrisë, Gjergj Buxhuku dhe bashkëpunëtorët e tij, ku ndanë jo vetëm shqetësimet e situatës ekonomike dhe financiare të bizneseve, por edhe vizionin e përbashkët mbi zhvillimin ekonomik të vendit gjatë viteve të ardhshme.

“Ky bashkëbisedim shërbeu për të diskutuar mbi planin tonë ekonomik, të cilin po e përshtasim me realitetin e ri ekonomik të krijuar për shkak të pandemisë COVID-19,” tha lideri i opozitës pas takimit duke saktësuar se ulja e taksave, thithja e investimeve të huaja, bashkëpunimi me biznesin, i cili në filozofinë tonë konsiderohet si punëdhënës dhe jo thjesht si taksapagues do të jenë prioritet.

Respektimi i sigurisë juridike e gërshetuar me politika të qëndrueshme fiskale dhe rregullatore do të jenë boshti kryesor i platformës tonë. Implementimi i taksës së sheshtë 9%, eleminimi i lejeve, licencave dhe autorizimeve, do të jenë faktorë vendimtar, sipas Kryetarit të Partisë Demokratike, në parandalimin e konkurrencës së pandershme në treg.

Reformat tona do të jenë të qarta, konkrete dhe të realizueshme, tha Kryetari i Partisë Demokratike, Lulzim Basha, pas takimit me Përfaqësuesit e Konfederatës së Industrive të Shqipërisë duke përfunduar:

“Vetëm kështu do të mund të fuqizojmë ekonominë dhe industrinë vendase, do të hapim vende të reja pune dhe të rrisim mirëqenien e shqiptarëve.”